CCHR | Cambodian Center for Human Rights

ម.ស.ម.ក ចេញផ្សាយសាលាកប័ត្រព័ត៌មានចំនួន៤ រៀងរាល់ខែផ្តោតលើប្រធានបទមួយក្នុងចំណោមប្រធានបទទាំង ៤៖

កម្រងឯកសារស្តីពីការពិនិត្យមើលលើច្បាប់

កម្រងឯកសារជាសាលាកប័ត្រព័ត៌មានពីរទំព័រនេះ ធ្វើការពិនិត្យឡើងវិញរាល់ច្បាប់ទាំង-ឡាយនៅកម្ពុជា ទាំងក្នុងពេលអតីតកាល បច្ចុប្បន្ន និងអនាគត ព្រមទាំងធ្វើការបង្ហាញនូវរូបភាពទូទៅនៃសេចក្តីព្រួយបារម្ភ និងអនុសាសន៍របស់ ម.ស.ម.ក បន្ថែមទៅលើសាវតារនៃភាពសមហេតុសមផលរបស់ច្បាប់នីមួយៗ និងដំណើរការនៃការពិគ្រោះយោបល់រហូតមកទល់បច្ចុប្បន្ន (ប្រសិនបើមាន)។ ម.ស.ម.ក ចាត់ចំណាត់ថ្នាក់ច្បាប់នីមួយៗ ដោយផ្អែកទៅលើ ភាពស្របនឹងរដ្ឋធម្មនុញ្ញនៃព្រះរាជាណាចក្រកម្ពុជា (រដ្ឋធម្មនុញ្ញ) ព្រមទាំងច្បាប់ជាតិនិងអន្តរជាតិដទៃទៀតដែលប្រទេសកម្ពុជាកំពុងអនុវត្ត។ ច្បាប់ដែលស្ថិតក្នុងចំណាត់ថ្នាក់ពណ៌បៃតង មានន័យថាជាច្បាប់ដែលអាចទទួលយកបាន ក្នុងគំនិតរបស់ ម.ស.ម.ក ច្បាប់ដែលស្ថិតក្នុងចំណាត់ថ្នាក់ពណ៌លឿង មានន័យថាជាច្បាប់ដែលនាំឲ្យមានសេចក្តីព្រួយបារម្ភមួយចំនួនដែលគួរតែត្រូវបានពិនិត្យមើលសាជាថ្មី និងកែលម្អ និង ច្បាប់ដែលស្ថិតក្នុងចំណាត់ថ្នាក់ពណ៌ក្រហមគឺជាច្បាប់ដែលរំលោភធ្ងន់ធ្ងរ ឬក៏បំពានលើរដ្ឋធម្មនុញ្ញ និង/ឬ ច្បាប់ជាតិនិងអន្តរជាតិ ដូច្នេះគួរតែបដិសេធ ទុកជាមោឃ ឬក៏ពង្រាងសាឡើងវិញ តាមភាពសមរម្យ។

កម្រងឯកសារស្តីពីសេរីភាពមូលដ្ឋាន

កម្រងឯកសារជាសាលាកប័ត្រព័ត៌មានពីរទំព័រនេះ មើលទៅលើសិទ្ធិជាមូលដ្ឋានដែលបានចែងនៅក្នុងច្បាប់អន្តរជាតិដែលប្រទេសកម្ពុជាបានផ្តល់សច្ចាប័ន។ សាលាកប័ត្រព័ត៌មាននេះ បង្ហាញនូវរូបភាពទូទៅនៃប្រធានបទជាក់លាក់ពាក់ព័ន្ធនឹងសិទ្ធិជាមូលដ្ឋាន បង្ហាញពីសេចក្តីព្រួយបារម្ភ និងអនុសាសន៍សំខាន់ៗ របស់ ម.ស.ម.ក បន្ថែមពីលើសាវតារនៃសិទ្ធិជាមូលដ្ឋានដែលកំពុងតែស្ថិតនៅក្នុងភាពមិនច្បាស់លាស់ និងស្ថានភាពនៃសិទ្ធមូលដ្ឋាននៅកម្ពុជា។

កម្រងឯកសារស្តីពីករណីសិក្សា

កម្រងឯកសារជាសាលាកប័ត្រព័ត៌មានពីរទំព័រនេះ ប្រមូលផ្តុំករណីសិក្សាដែល ម.ស.ម.ក យល់ឃើញថាមានអត្ថប្រយោជន៍ មានភាពពាក់ព័ន្ធ និងឆ្លុះបញ្ចាំងនូវទិដ្ឋភាពដ៏ជាក់លាក់នៃបញ្ហាសិទ្ធិមនុស្ស។ សាលាកប័ត្រព័ត៌មាននេះ បង្ហាញរូបភាពទូទៅនៃករណីសិក្សាដែលស្ថិតក្នុងភាពមិនច្បាស់លាស់ បង្ហាញពីសេចក្តីព្រួយបារម្ភ និងអនុសាសន៍សំខាន់ៗ របស់ ម.ស.ម.ក បន្ថែមពីលើសាវតារនៃករណីសិក្សា។

កម្រងឯកសារស្តីពីការពិនិត្យមើលលើស្ថាប័ន

សលាកបត្រព័ត៍មានពីរទំព័រដែលចេញផ្សាយជាបន្តបន្ទាប់គ្នានេះពណ៌នាអំពីទិដ្ឋភាពទូទៅនៃស្ថាប័ននានារបស់កម្ពុជា និងផ្តល់នូវការពណ៌នាជាទូទៅអំពីការព្រួយបារម្ភជាគន្លឹះ និងការផ្តល់អនុសាសន៍នានាដោយមជ្ឈមណ្ឌលសិទ្ធិមនុស្សកម្ពុជា (ម.ស.ម.ក) ។ ម.ស.ម.ក. ធ្វើការសិក្សាទៅលើស្ថាប័ននិមួយៗដោយយោងលើរបៀបដែលស្ថាប័នត្រូវបានបង្កើតឡើងដោយច្បាប់ និង របៀបនៃការអនុវត្តន៍ការងារ ថាតើគោរពគោលការណ៍នៃការបែងចែកអំណាចដែរឬទេ និង ការពិចារណាលើលក្ខណៈច្បាប់ និង ធម្មនុញ្ញភាពដទៃទៀត។ ពេលស្ថាប័នមួយត្រូវបានបង្កើតឡើងដោយមានបញ្ហាច្រើនដែលរួមទាំងនៅពេលដែលបញ្ហា ឯករាជ្យភាព និង/ឬ សុចរិតភាពត្រូវបានរងឥទ្ធិពលមិនល្អ ឬ នៅពេលដែលស្ថាប័នទាំងនោះបានរំលោភលើរដ្ឋធម្មនុញ្ញនៃព្រះរាជាណាចក្រកម្ពុជា និង/ឬ ច្បាប់ជាតិ និង ច្បាប់អន្តរជាតិកំពុងនៅជាធរមាន ម.ស.ម.ក. ស្នើនូវអនុសាសន៍ទាក់ទងនឹងបញ្ញត្តិច្បាប់ពាក់ព័ន្ធ និង/ឬ រចនាសម្ព័ន្ធ ។