មជ្ឈមណ្ឌលសិទ្ធិមនុស្សកម្ពុជា (ម.ស.ម.ក)

យុទ្ធនាការដើម្បីបញ្ឈប់និទណ្ឌភាពនៅកម្ពុជា ២០១៣

នាទិវាអន្តរជាតិបញ្ឈប់និទណ្ឌភាព នៅថ្ងៃទី២៣ ខែវិច្ឆិកា ឆ្នាំ២០១៣ មជ្ឈមណ្ឌលសិទ្ធិមនុស្សកម្ពុជា (ម.ស.ម.ក) បានលើកបង្ហាញ ក្នុងពេញមួយខែវិច្ឆិកា អំពីករណីនិទណ្ឌភាពដែលកំពុងកើតមានជាបន្ត ដែលនឹងផ្ដល់ផលប៉ះពាល់យ៉ាងធ្ងន់ធ្ងរដល់ការអភិវឌ្ឍន៍លទ្ធិប្រជាធិបតេយ្យនៅកម្ពុជា។ ករណីទាំងនេះមានលក្ខណៈផ្សេងៗគ្នា ដែលមានដូចជា ឃាតកម្មមកលើសកម្មជនសិទ្ធិមនុស្ស និងអ្នកសារព័ត៌មាន ដែលករណីទាំងនោះមិនដែលត្រូវបានស៊ើបអង្កេតឲ្យបានពេញលេញ, ករណីដែលកងកម្លាំងសន្តិសុខវាយដំមកលើប្រជាពលរដ្ឋ ហើយមិនដែលត្រូវបានផ្តន្ទាទោស និងករណីដែលមានមន្ត្រីដែលមានទំនាក់ទំនងល្អជាមួយអ្នកមានអំណាច ដែលទោះបីជារងការកាត់ក្ដីទៅហើយ ក៏ពួកគេមិនដែលទទួលរងនូវទោសទណ្ឌដែលពួកគេបានប្រព្រឹត្តនោះទេ។

តើនិទណ្ឌភាពជាអ្វី?

និទណ្ឌភាព មានន័យសាមញ្ញថា "គ្មានការដាក់ទោសពិន័យ" ឬ "គ្មានផលវិបាក"។ នៅកម្ពុជា ជនល្មើសដែលប្រព្រឹត្តបទល្មើសតែងតែមិនដែលត្រូវបាននាំយកមកដាក់ទោស ដែលមានន័យថា ជនរងគ្រោះនៃបទល្មើសទាំងនោះមិនដែលទទួលបានយុត្តិធម៌នោះទេ។ បន្ថែមពីលើនោះ មិនតែប៉ុណ្ណោះ បុគ្គលដែលគេចផុតពីការដាក់ទោស គឺជាបុគ្គលដែលមានទំនាក់ទំនងល្អជាមួយអ្នកមានអំណាច ហើយបានធ្វើសកម្មភាពដៅមុខសញ្ញាមកលើបុគ្គលដែលទាមទាររកយុត្តិធម៌ និងសិទ្ធិមនុស្សនៅកម្ពុជា។

តើលោកអ្នកអាចធ្វើអ្វីបានខ្លះដើម្បីបញ្ឈប់និទណ្ឌភាព?

លោកអ្នកអាចទាញយកខិតបណ្ណនៃយុទ្ធនាការ និងករណីសិក្សាខាងក្រោមនេះ ដោយគ្រាន់តែចុចលើខិតបណ្ណនីមួយៗ។ យើងខ្ញុំសូមលើកទឹកចិត្ដឲ្យសាធារណជនចែករំលែកព័ត៌មានទាំងនេះជាមួយមិត្ដភក្ដិដទៃទៀត តាមរយៈបណ្ដាញព័ត៌មានសង្គម ឬផ្តិតចេញជាឯកសារសម្រាប់ប្រើប្រាស់ ដើម្បីរួមចំណែកលើកកម្ពស់ការយល់ដឹងពាក់ព័ន្ធនឹងយុទ្ធនាការនេះ។

លោកអ្នកក៏អាចចូលរួមជាមួយ ម.ស.ម.ក នៅថ្ងៃទី២៣ ខែវិច្ឆិកា នៅម៉ោង ២.៣០នាទីរសៀល ដើម្បីចូលរួមក្នុងការបញ្ចាំងភាពយន្តឯកសារ និងការជជែកពិភាក្សាពីនិទណ្ឌភាព។

ម្យ៉ាងទៀត សូមកុំភ្លេចចូលទៅកាន់ ទំព័រយុទ្ធនាការទិវាអន្តរជាតិបញ្ឈប់អំពើហិង្សា ដែលរៀបចំឡើងដោយអង្គការដៃគូរបស់យើង គឺ គូសន្ទនាអន្តរជាតិដើម្បីសេរីភាពបញ្ចេញមតិ (អាយហ្វ៊ិក) ដើម្បីធ្វើសកម្មភាពប្រឆាំងនឹងនិទណ្ឌភាពនៅក្នុងប្រទេសជាច្រើនជុំវិញពិភពលោក។