មជ្ឈមណ្ឌលសិទ្ធិមនុស្សកម្ពុជា (ម.ស.ម.ក)

ទិវាសេរីភាពសារព័ត៌មានពិភពលោក ២០១៣

២២ ឧសភា ២០១៣ | ហេង ស៊ីនិត្យ

លោក ហេង ស៊ីនិត្យ គឺជាអ្នកថតរូបសារព័ត៌មាន ឲ្យសារព័ត៌មាន អាសូស៊ីអេត ប្រែស ដែលជាប្រភពព័ត៌មានឯករាជ្យព័ត៌មានដ៏ធំ និងទទួលបានការជឿជាក់បំផុត។ ក្នុងពេលដែលលោកធ្វើការជាមួយ អាសូស៊ីអេត ប្រែស លោកស៊ីនិត្យ បានរាយការណ៍ពីព្រឹត្តិការណ៍សំខាន់ៗជាច្រើន រួមមានដូចជា ការប្រកួតកីឡាប្រចាំអាស៊ីអាគ្នេយ៍លើកទី២៤ និងកិច្ចប្រជុំកំពូលអាស៊ាន លើកទី២០។

មុនពេលចាប់ផ្តើមការងាររបស់លោកជាមួយ អាសូស៊ីអេត ប្រែស លោកស៊ីនិត្យ ជាដំបូងចាប់ផ្តើមអាជីពជាអ្នកថតរូបរបស់លោក ដោយការធ្វើជាអ្នកថតរូបភ្ញៀវទេសចរណ៍ដែលមកលេងខាងមុខព្រះបរមវាជវាំង។ ប៉ុន្តែ សារព័ត៌មានក្នុងស្រុកមួយ គឺខ្មែរឯករាជ្យក៏បានចាប់អារម្មណ៍ពីជំនាញរបស់លោកស៊ីនិត្យ ហើយបានជ្រើសរើសលោកឲ្យធ្វើជាអ្នកសារព័ត៌មានផ្នែករូបថត ក្នុងឆ្នាំ១៩៩៣។ ខណៈពេលដែលការងាររបស់លោកបានបន្តទៅមុខ លោកស៊ីនិត្យ ក្រោយមកទៀតក៏បានក្លាយទៅជាអ្នកថតរូបឯករាជ្យ ឲ្យភ្នាក់ងារសារព័ត៌មានមួយចំនួន ដូចជា រ៉យទ័រ ទស្សនាវដ្តីថាមស៍ ញូស៍វីក និង ឌឹ ញូវយ៉កថាមស៍។

សាររបស់លោកស៊ីនិត្យ ៖ “ខ្ញុំជាអ្នកថតរូបសារព័ត៌មាន ដែលបានឧទ្ទិសបេះដូង និងព្រលឹងដើម្បីផលប្រយោជន៍របស់ប្រទេសជាតិ។ ខ្ញុំចង់ក្លាយទៅជាអ្នកថតរូបជនជាតិកម្ពុជាមួយរូបដែលទទួលស្គាល់ជាអន្តរជាតិ។ខ្ញុំសង្ឃឹមថាក្នុងពេលអនាគត កម្ពុជានឹងត្រូវបានដឹកនាំដោយអ្នកនយោបាយដែលធ្វើការរួមគ្នាដើម្បីការផ្លាស់ប្ដូរជាវិជ្ជមាន។ តាមរយៈការលើកកម្ពស់ការយល់ដឹងផ្នែកសង្គម អ្នកសារព័ត៌មាននឹងអាចធ្វើឲ្យគោលបំណងមួយនេះក្លាយទៅជាការពិតបាន។”

២១ ឧសភា ២០១៣ | ពុយ គា

លោក ពុយ គា បច្ចុប្បន្នជាអ្នកឆ្លើយឆ្លងឲ្យទីភ្នាក់ងារសារព័ត៌មានក្យូដូ ជាទីភ្នាក់ងារសារព័ត៌មានដែលមានឥទិ្ធពលបំផុតនៅប្រទេសជប៉ុន។ ក្រៅពីនេះលោក មានទំនាក់ទំនងជាមួយនឹងអង្គការធំៗជាច្រើនដូចជា ក្លឹបអ្នកកាសែតកម្ពុជា ក្រុមប្រឹក្សាសីលធម៌អ្នកកាសែតកម្ពុជា និងមជ្ឈមណ្ឌលការសិក្សាយុទ្ធសាស្រ្តអាស៊ី។ លោកបានបញ្ចប់ថ្នាក់អនុបណ្ឌិត ផ្នែកវិទ្យាសាស្រ្តនយោបាយ ពីសាកលវិទ្យាល័យកម្ពុជា និងបច្ចុប្បន្នលោកកំពុងបន្តថ្នាក់បណ្ឌិត ផ្នែកទំនាក់ទំនងអន្តរជាតិ។

លោក ពុយ គា បានចាប់ផ្តើមអាជីពរបស់លោកក្នុងនាមជាប្រធានក្រុមហ៊ុនរាហ៊ូ និងអាសូស៊ីអេត ដែលផ្ដល់សេវាប្រឹក្សាផ្នែកប្រព័ន្ធផ្សព្វផ្សាយ ការបកប្រែ និងការបោះពុម្ព។ ក្នុងអំឡុងពេលដែលលោកបន្តអាជីពជាអ្នកសារព័ត៌មាន លោកបានក្លាយជាអ្នកអត្ថាធិប្បាយឲ្យវិទ្យុសំឡេងខ្មែរអាមេរិកាំង ហើយលោកក៏ធ្លាប់ ជាទីប្រឹក្សាយោបល់ក្នុងការលើកកម្ពស់ប្រព័ន្ធផ្សព្វផ្សាយ និងព័ត៌មានសាធារណៈរបស់កម្មវិធីអភិវឌ្ឍន៍អង្គការសហប្រជាជាតិ (យូអិនឌីភី)។ ក្នុងចំណោមការងាររបស់លោក លោកក៏ជាវាគ្មិនកិត្តិយសឲ្យវិទ្យាស្ថានអប់រំផ្សេងៗ ក៏ដូចជា តាមបណ្ដាទូរទស្សន៍ និងវិទ្យុ ហើយលោកក៏ជាអ្នកនិពន្ធដ៏លេចធ្លោមួយរូបផងដែរ។

សាររបស់លោក ពុយ គា “សាធារណជនគួរតែបានឮ ឃើញ និងដឹងពីអ្វីដែលកំពុងកើតឡើងទាំងក្នុងតំបន់ និងសហគមន៍អន្តរជាតិ។ ប្រទេសមួយដែលគ្មានអ្នកកាសែតគឺជាជាតិមួយដែលគ្មានអារ្យធម៌ ត្រចៀកថ្លង់ និងស្រវាំងភ្នែក ហើយប្រសិនជាគ្មានអ្នកសារព័ត៌មានអាជីពនោះទេ ប្រជាជនដែលរស់នៅក្នុងសតវ្សរ៍ទី២១នេះ នឹងជួបផលវិបាកក្នុងការទទួលព័ត៌មានពិត និងពិបាកក្នុងការសម្រេចចិត្ត។”

២០ ឧសភា ២០១៣ | ប៉ែន សមិទ្ធិ

លោក ប៉ែន សមិទ្ធិ ជានិពន្ធនាយក របស់សារព័ត៌មានរស្មីកម្ពុជា ដែលជាសារព័ត៌មានភាសាខ្មែរធំជាងគេនៅកម្ពុជា និងជាអគ្គនាយក របស់វែបសាយសារព័ត៌មានខេមបូឌា អ៊ិចប្រែស ញូស៍ និងវែបសាយខេមបូឌា ហឺរ៉ល។ ក្នុងពេលទំនេរ លោកស្ម័គ្រចិត្តធ្វើជាប្រធានក្លឹបអ្នកកាសែតកម្ពុជា និងជាសាស្ត្រាចារ្យនៅ សកលវិទ្យាល័យភូមិន្ទភ្នំពេញ នៅក្នុងដេប៉ាតឺម៉ង់ ប្រព័ន្ធផ្សព្វផ្សាយ និងសារគមនាគមន៍។

ក្នុងឆ្នាំ១៩៨១ លោកសមិទ្ធិ ចាប់ផ្តើមអាជីពជាអ្នកសារព័ត៌មាន ជាមួយកាសែតរបស់គណបក្សប្រជាជនកម្ពុជាឈ្មោះថាកាសែតភ្នំពេញ។ ទោះបីជាលោកនៅមានវ័យក្មេងក៏ដោយ តែលោកសមិទ្ធិមានទំនួលខុសត្រូវជាច្រើន និងបានជួយក្នុងការកែតម្រូវអត្ថបទ រាយការណ៍ព័ត៌មាន និងការរចនាទំព័រកាសែត។ លោកត្រូវបានតែងតាំងទៅជានិពន្ធនាយកក្នុងកាសែតដដែលនេះ។ បន្ទាប់ពីរយៈពេល ៧ឆ្នាំក្នុងឋានៈជានិពន្ធនាយក លោកសមិទ្ធិបានចាកចេញពី កាសែតភ្នំពេញ ហើយក្លាយទៅជាស្ថាបនិកមួយរូបដើម្បីបង្កើតសារព័ត៌មានរស្មីកម្ពុជា។

សាររបស់លោកសមិទ្ធិ ៖ “អ្នកជំនាន់ក្រោយមានសំណាងណាស់ ពួកគេអាចជ្រើសរើសអាជីពដោយខ្លួនគេផ្ទាល់ និងតម្រង់ទិសដៅអនាគតរបស់ពួកគេ។ កាលពីខ្ញុំនៅក្មេង ខ្ញុំមិនមានឱកាសបែបនេះទេ។ ខ្ញុំសូមជំរុញឲ្យយុវជនកម្ពុជាទាំងអស់ ចាប់យកឱកាសដ៏ល្អនេះ និងធ្វើសកម្មភាពរបស់ខ្លួនយ៉ាងមានទំនួលខុសត្រូវ។ អ្នកជំនាន់ថ្មីមានសក្តានុពលជាច្រើន ប៉ុន្តែខ្ញុំបារម្ភថាពួកគេគ្មានវិន័យក្នុងខ្លួន។ ខ្ញុំសង្ឃឹមថាយុវជនកម្ពុជាមើលឃើញពីឱកាសរបស់ពួកគេ និងធ្វើអ្វីដែលល្អបំផុតសម្រាប់ពួកគេ និងសង្គម។”

១៩ ឧសភា ២០១៣ | ឆាយ ច័ន្ទនីដា

លោកស្រី ឆាយ ច័ន្ទនីដា ជាអនុប្រធានគ្រប់គ្រងបុគ្គលិកនៅ សារព័ត៌មាន ឌឹ ភ្នំពេញ ប៉ុស្តិ៍។ លោកស្រីច័ន្ទនីដា មានមោទនភាពខ្លាំងណាស់ ដែលបានធ្វើការជាមួយសារព័ត៌មានឯករាជ្យ និងសប្បាយរីករាយក្នុងការជជែកវែកញែកពីបញ្ហាសង្គមដែលកំពុងតែកើតមាននៅក្នុងប្រទេសកម្ពុជាបច្ចុប្បន្ន។

មុនពេលលោកស្រីចូលរួមការងារជាមួយសារព័ត៌មាន ឌឹ ភ្នំពេញ ប៉ុស្តិ៍ លោកស្រីច័ន្ទនីដា បានចាប់ផ្តើមអាជីពរបស់ខ្លួន ជាអ្នកសារព័ត៌មានក្នុងឆ្នាំ ២០០៣ មានតួនាទីជាអ្នកយកព័ត៌មានឲ្យស្ថានីយទូរទស្សន៍កម្ពុជា (ស៊ីធីអិន) និងធ្វើការជាអ្នកសារព័ត៌មានឲ្យសារព័ត៌មាន ឌឹ ខេមបូឌា ដេលី។ ក្នុងឆ្នាំ២០០៨ លោកស្រីត្រូវបានជ្រើសរើសឲ្យទទួលតំណែងបច្ចុប្បន្នជាមួយសារព័ត៌មាន ឌឹ ភ្នំពេញ ប៉ុស្តិ៍។ ក្នុងនាមជាអនុប្រធានគ្រប់គ្រងបុគ្គលិក លោកស្រីច័ន្ទនីដា បានបោះពុម្ពផ្សាយអត្ថបទមួយចំនួន រួមមាន ការកាប់ឈើខុសច្បាប់ ជម្លោះដីធ្លី សុខភាពសាធារណៈ នយោបាយ និងបរិស្ថាន។ អត្ថបទទាំងនោះត្រូវបានបោះពុម្ពផ្សាយទាំងជាភាសាអង់គ្លេស និងភាសាខ្មែរ។ លោកស្រីច័ន្ទនីដា មិនមានការភ័យខ្លាចក្នុងការពិភាក្សាពីបញ្ហាការរំលោភបំពានសិទ្ធិមនុស្សនោះទេ ហើយថែមទាំងយល់ថាបញ្ហានេះមានសារៈសំខាន់ដើម្បីអាចផ្ដល់ការរិះគន់បែបស្ថាបនាសម្រាប់គោលនយោបាយរបស់រដ្ឋាភិបាលទៀតផង។ សាររបស់លោកស្រីច័ន្ទនីដា ៖ “វាពិតជាមានសារៈសំខាន់ណាស់សម្រាប់អ្នកសារព័ត៌មាន ដើម្បីផ្ដល់ព័ត៌មានត្រឹមត្រូវ យុត្តិធម៌ និងមិនលម្អៀង។

ប្រសិនបើអ្នកសារព័ត៌មានមិនគោរពតាមស្តង់ដារទាំងអស់នេះនោះទេ ប្រជាពលរដ្ឋនឹងមិនជឿជាក់លើពួកគេនោះទេ។ សារព័ត៌មានឯករាជ្យមានសារៈសំខាន់ខ្លាំងណាស់សម្រាប់សង្គម។ សាធារណជនគួរតែបានដឹងនូវការពិត។”

១៨ ឧសភា ២០១៣ | ឆាយ សុផល

លោក ឆាយ សុផល ជានាយកគ្រប់គ្រងនៃ វែបសាយសារព័ត៌មាន ឃែមបូឌា ញូស៍។ លោកជាអ្នកតស៊ូមតិដ៏ខ្លាំងក្លាដើម្បីឯករាជ្យភាពនៃអ្នកសារព័ត៌មាន និងដឹកនាំស្ថាប័នដែលមានបេសកកម្មដើម្បីលើកកម្ពស់ “ប្រព័ន្ធផ្សព្វផ្សាយ និងការទំនាក់ទំនងសេរី និងមានវិជ្ជាជីវៈ មានការគិតដោយសេរី លទ្ធភាពទទួលបានព័ត៌មាន តម្លាភាព គណនេយ្យភាព និងនីតិរដ្ឋ”។

លោកសុផល ចាប់ផ្តើមអាជីពរបស់លោកតាំងពីឆ្នាំ ១៩៩0 ពេលដែលលោកត្រូវបានជ្រើសរើសធ្វើជាអ្នកបកប្រែផ្ទាល់មាត់ឲ្យអ្នកសារព័ត៌មានអន្តរជាតិ។ បន្ទាប់ពីការងាររបស់លោកជាអ្នកបកប្រែផ្ទាល់មាត់លោក សុផល ត្រូវបានជ្រើសរើសឲ្យធ្វើជាអ្នកសារព័ត៌មានជាមួយទីភ្នាក់ងារសារព័ត៌មានរ៉យទ័ររបស់ប្រទេសអង់គ្លេស។ លោក សុផល បាន ធ្វើការជាមួយភ្នាក់ងារសារព័ត៌មានរ៉យទ័រ អស់រយៈពេលជិត៨ឆ្នាំមុននឹងបង្កើតគេហទំព័រព័ត៌មាន ឃែមបូឌា ញូស៍ ក្នុងឆ្នាំ២០០៣។ គេហទំព័រ ឃែមបូឌា ញូស៍(www.thisiscn.com) កន្លងមកបាន ផ្ដល់ព័ត៌មានមិនលម្អៀងនិងឥតគិតថ្លៃ និងធ្វើការសហការជាមួយនិងរដ្ឋាភិបាល និងអង្គការសង្គមស៊ីវិលដើម្បីផ្ដល់នូវការបណ្ដុះបណ្ដាលផ្នែកសារព័ត៌មាន និងទំនាក់ទំនង។ ទសវត្សរ៍ក្រោយមកនេះ លោកសុផល ជឿជាក់ថា អ្នកសារព័ត៌មានរងការរិតត្បិតតិចជាងមុន ហើយស្ថានភាពកំពុងតែមានភាពប្រសើរឡើង។

សាររបស់លោក សុផល ៖“ខណៈដែលការប្រើប្រាស់បណ្ដាញសង្គមកំពុងតែកើនឡើង ប្រជាពលរដ្ឋកម្ពុជាចូលចិត្តផ្សព្វផ្សាយព័ត៌មានយ៉ាងច្រើនដែលមិនធ្លាប់មានពីមុនមក។ ខ្ញុំសូមជំរុញឲ្យអ្នកសារព័ត៌មានប្រជាពលរដ្ឋទាំងអស់ឲ្យគោរពក្រមសីលធម៌វិជ្ជាជីវៈនិងជាអ្នកសារព័ត៌មានដែលមានមនសិកា។ ធ្វើបែបនេះ ព័ត៌មាននៅក្នុងប្រទេសកម្ពុជានឹងកាន់តែល្អប្រសើរឡើង។”

១៧ ឧសភា ២០១៣ | ជ័យ សម្បត្តិ

លោក ជ័យ សម្បត្តិ គឺជាអ្នកផលិតកម្មវិធីទូរទស្សន៍ឲ្យយុទ្ធនាការផ្សព្វផ្សាយ ឡូយ ៩។ ឡូយ ៩ គឺជាកម្មវិធីកំសាន្ដដែលមានប្រជាប្រិយភាព ដែលរួមមានការផ្សព្វផ្សាយតាមវិទ្យុ ព្រឹត្តិការណ៍បន្តផ្ទាល់ និងផ្សាយលើប្រព័ន្ធអ៊ីនធើណែត។ ឡូយ ៩ ជំរុញឲ្យយុវជនកម្ពុជាចូលរួមយ៉ាងសកម្មក្នុងកិច្ចការប្រទេសជាតិ ដែលលោកសម្បត្តិ មានមោទនភាព ក្នុងនាមជាអ្នករួមចំណែកធ្វើឲ្យយុទ្ធនាការនេះទទួលបានភាពជោគជ័យគួរឲ្យកត់សម្គាល់។ លោក សម្បត្តិបានបញ្ចប់បរិញ្ញាប័ត្រ ផ្នែកគ្រប់គ្រងសារព័ត៌មាន ពីសាកលវិទ្យាល័យភូមិន្ទភ្នំពេញ។

ក្នុងឆ្នាំ ២០១០ លោកសម្បត្តិ បានចូលធ្វើការជាមួយ ប៊ីប៊ីស៊ី មីឌៀ អាក់ស៊ិន ដែលជាការផ្តួចផ្តើមរបស់ ប៊ីប៊ីស៊ី ក្នុងការជំរុញឲ្យយុវជនចូលរួមកាន់តែច្រើនទៅក្នុងការសម្រេចចិត្តថ្នាក់ជាតិ។ លោកសម្បត្តិ ជឿជាក់ថាភាពក្រីក្រជាបន្តបន្ទាប់នេះគឺកើតឡើងដោយសារតែកង្វះខាតព័ត៌មានដែលត្រឹមត្រូវ ហើយ ប៊ីប៊ីស៊ី មីឌៀ អាក់ស៊ិន ផ្ដល់ឱកាសឲ្យលោកក្នុងការធ្វើឲ្យមានការផ្លាស់ប្ដូរ។ លោកសម្បត្តិ ចាប់ផ្តើមការងារជាមួយ ប៊ីប៊ីស៊ី មីឌៀ អាក់ស៊ិន ក្នុងឋានៈជាអ្នកផលិតកម្មវិធីវិទ្យុ និងទទួលខុសត្រូវចំពោះកម្មវិធីវិទ្យុចំនួនពីរ។ កម្មវិធីនេះផ្តោតលើបញ្ហារបស់យុវជន ដូចជា មេរោគអេដស៍និងសុខភាពបន្តពូជ ក្រុមជើងកាង ការញៀនថ្នាំ និងភាពគ្មានការងារធ្វើ។ បន្ទាប់មក លោកត្រូវបានតែងតាំងឲ្យទទួលតួនាទីដែលលោកកំពុងធ្វើបច្ចុប្បន្ន គឺក្នុងឋានៈជា អ្នកផលិតកម្មវិធីទូរទស្សន៍ ឡូយ ៩ ដែលអនុវត្តដោយ ប៊ីប៊ីស៊ី មីឌៀ អាក់ស៊ិន ជាមួយនឹងការឧបត្ថម្ភមូលនិធិពី កម្មវិធីអភិវឌ្ឍន៍របស់អង្គការសហប្រជាជាតិ និងរដ្ឋាភិបាលស៊ុយអែត។

សាររបស់លោកសម្បត្តិ ៖ “សន្តិភាពពិតប្រាកដអាចកើតឡើងបាន លុះត្រាណាតែមនុស្សក្នុងសង្គមមួយរស់នៅដោយគ្មានជម្លោះ ភាពអត់ឃ្លាន ភាពចលាចល និងការគំរាមកំហែង។ តាមរយៈការអនុវត្តសិទ្ធិសេរីភាពបញ្ចេញមតិ សន្តិភាពពិតប្រាកដនឹងអាចកើតឡើងបាន។ តាមរយៈ ការបញ្ចេញគំនិត និងទស្សនៈផ្ទាល់ខ្លួន ការអភិវឌ្ឍន៍សង្គមនឹងអាចក្លាយជាការពិតបាន។”

១៦ ឧសភា ២០១៣| អ៊ឹម រចនា

កញ្ញា អ៊ឹម រចនា ជាអ្នកសារព័ត៌មានមួយរូបរបស់ ស្ថានីយវិទ្យុបារាំងអន្តរជាតិ។ រចនា មានបទពិសោធន៍ជាអ្នកសារព័ត៌មានអស់រយៈពេលជាង ៥ឆ្នាំ និងធ្លាប់បានធ្វើការជាមួយ ទស្សនាវដ្ដីឡារ៉ែនជាអ្នកប្រែសម្រួលអត្ថបទ និងទស្សនាវដ្តីហេលស៍ថាមស៍ ក្នុងឋានៈជានិពន្ធនាយក។ កញ្ញាមានបំណងប្រាថ្នាយ៉ាងមុះមុតមកលើការងាររបស់កញ្ញា និងជឿជាក់ថាសារព័ត៌មានឯករាជ្យ មានសារៈសំខាន់ចំពោះសង្គមកម្ពុជា។

តាំងពីក្មេងវ័យមក កញ្ញារចនា ដឹងច្បាស់ថានាងចង់ក្លាយជាអ្នកសារព័ត៌មាន ហើយការពិតដែលថាស្រ្តីមិនសូវធ្វើការក្នុងអាជីពនេះមិនបានបន្ទច់បង្អាក់កញ្ញាក្នុងការប្រឡូកក្នុងវិស័យនេះឡើយ។ ក្នុងពេលការសិក្សា លោកគ្រូរបស់កញ្ញាម្នាក់ បានដាស់តឿនកញ្ញាថាការធ្វើតាមបំណងប្រាថ្នានេះ អាចនឹងធ្វើឲ្យកញ្ញាប្រឈមនឹងការនិរទេសខ្លួន ការជាប់ពន្ធនាគារ ឬសូម្បីតែបាត់បង់ជីវិត។ ទោះបីជាយ៉ាងណាក៏ដោយ រចនា នៅតែមិនរាថយ និងធ្វើការបន្តទៀតដើម្បីក្លាយទៅជាអ្នកសារព័ត៌មានដ៏ល្បីឈ្មោះម្នាក់។

សាររបស់កញ្ញារចនា ៖ “ខ្ញុំជាអ្នកមានជំនឿចំពោះតួនាទីដ៏សំខាន់របស់សារព័ត៌មាន។ អ្នកសារព័ត៌មានដើរតួនាទីយ៉ាងសំខាន់ ក្នុងការកំណត់ថាតើពិភពលោកនឹងក្លាយទៅជាកន្លែងមួយដែលប្រសើរឡើងឬក៏អត់? យើងជាអ្នកសារព័ត៌មាន មានអំណាចដើម្បីនាំឲ្យមានការផ្លាស់ប្ដូរ ហើយខ្ញុំសន្យាថាខ្ញុំនឹងប្រើប្រាស់អាជីពរបស់ខ្ញុំដើម្បីធ្វើរឿងល្អៗសម្រាប់សង្គម។ ខ្ញុំសង្ឃឹមថា អ្នកសារព័ត៌មានដទៃទៀតនឹងធ្វើដូចគ្នាដែរ។”

១៥ ឧសភា ២០១៣ | សុខ រដ្ឋា

លោក សុខ រដ្ឋា ហៅ រដ្ឋា វិសាល ធ្វើការជាអ្នកយកព័ត៌មាន ប្រចាំនៅភាគឦសាន នៃប្រទេសកម្ពុជា ជាមួយវិទ្យុអាស៊ីសេរី និងបានរាយការណ៍លើបញ្ហាការរំលោភបំពានជាច្រើនក្នុងខេត្ត ខេត្តរតនៈគីរិ ខេត្តមណ្ឌលគិរី និងខេត្តស្ទឹងត្រែង។

លោក រដ្ឋា វិសាល មានបទពិសោធន៍ជាអ្នកសារព័ត៌មានអស់រយៈពេលជាង ២០ឆ្នាំ។ មុនពេលធ្វើការជាមួយ វិទ្យុអាស៊ីសេរី លោកធ្លាប់ធ្វើការជាមួយកាសែតបោះពុម្ពផ្សាយ ដូចជា កាសែតព្រលឹងជាតិ ព្រឹត្តិបត្រកម្លាំងសេដ្ឋកិច្ចថ្មី កាសែតកម្ពុជាថ្ងៃនេះ និងដំណឹងពេលល្ងាច។ ក្នុងឆ្នាំ២០០៦ និយតករក្រុមប្រឹក្សាផ្សព្វផ្សាយរបស់សហរដ្ឋអាមេរិក បានប្រគល់ពានរង្វាន់អ្នកសារព័ត៌មានឆ្នើម ដេវីដ ដាប់ប៊លយូ ប៊ើក ជូនលោកដើម្បីទទួលស្គាល់ពីការផ្សាយព័ត៌មានបែបច្នៃប្រឌិតពីតំបន់ដាច់ស្រយាលនៃប្រទេសកម្ពុជា ដែលជាទូទៅការរាយការណ៍បែបនេះតែងតែធ្វើឲ្យលោកត្រូវប្រឈមមុខនឹងគ្រោះថ្នាក់ជាច្រើន។

សាររបស់លោករដ្ឋា ៖ “អាជីពអ្នកកាសែតមិនមែនជាអាជីពធម្មតាដូចអាជីពដទៃទៀតទេ។ អ្នកសារព័ត៌មាននៅប្រទេសកម្ពុជា តែងតែរងការគំរាមកំហែង និងការរើសអើង។ ទោះបីជាអាជីពនេះប្រឈមនឹងឧបសគ្គជាច្រើនក៏ដោយ ខ្ញុំសង្ឃឹមថា ប្រជាពលរដ្ឋនឹងយល់អំពីសារៈសំខាន់របស់ប្រព័ន្ធសារព័ត៌មាន ដើម្បីអាចឆ្លងកាត់ឧបសគ្គទាំងនោះបាន។ តាមរយៈការធ្វើការជាមួយគ្នា យើងអាចអាចធ្វើឲ្យក្ដីសុបិនដែលចង់ឃើញប្រព័ន្ធសារព័ត៌មានសេរីអាចក្លាយជាការពិតបាន” ។

១៤ ឧសភា ២០១៣ | វ៉ា ស៊ីមន

លោកស្រី វ៉ា ស៊ីមន មានអាយុ ៣៨ឆ្នាំ ជាបុគ្គលិកធ្វើការនៅមណ្ឌលព័ត៌មានស្រ្តីកម្ពុជា លោកស្រីចាប់ផ្តើមធ្វើការតាំងពីឆ្នាំ ១៩៩៨ មកម្លេះ។ លោកស្រីចាប់ផ្តើមការងារដំបូងគឺជាអ្នកបច្ចេកទេសសំឡេង ជាពិធីការិនី ហើយក្រោយមកក្នុងឆ្នាំ២០០០ លោកស្រីបានចូលរួមផលិតក្នុងតួនាទីជាអ្នកថតកម្មវិធីទូរទស្សន៍ ផ្សាយប្រចាំសប្តាហ៍របស់មណ្ឌលព័ត៌មានស្រ្តីកម្ពុជា មានដូចជា បទយកការណ៍ ឯកសារ ស្ពត់ រឿងកំប្លែង រឿងវីដេអូអប់រំ។

ស្នាដៃការងាររបស់លោកស្រីភាគច្រើនផ្តោតលើប្រធានបទពាក់ព័ន្ធនិងស្រ្តីនិងកុមារ ដូចជា អំពើហឹង្សាលើស្រ្តីនិងកុមារ យេនឌ័រនិងសិទ្ធិស្រ្តី ស្រ្តីនិងភាពដឹកនាំ ការជួញដូរគ្រឿងញៀន ជំងឺអេដស៍ ។ល។ កម្មវិធីទាំងនេះត្រូវបានចាក់ផ្សាយតាមបណ្តាស្ថានីយ៍ទូរទស្សន៍ជាតិ បណ្ដាញទូរទស្សន៍កម្ពុជា (ស៊ីធីអិន) ស្ថានីយ៍ទូរទស្សន៍ប៉ុស្តិ៍លេខបី និងស្ថានីយ៍ទូរទស្សន៍អាស៊ីអាគ្នេយ៍។

សាររបស់លោកស្រីស៊ីមន “ក្នុងរយៈពេល ១៥ឆ្នាំ នៃជីវិតជាអ្នកសារព័ត៌មាន ខ្ញុំជាអ្នកថត អ្នកកាត់ត និង អ្នកយកសំឡេង។ ក្នុងរយៈពេលបំពេញការងារនេះ មានអនុស្សាវរីយ៍រីករាយដែលខ្ញុំបានឆ្លងកាត់។ ទោះបីជាពេលខ្លះត្រូវធ្វើការជិត២៤ម៉ោង ក្នុងមួយថ្ងៃ ហាលភ្លៀងហាលខ្យល់ ត្រូវទៅធ្វើការឆ្ងាយពីផ្ទះ ចោលកូនចៅ និងក្រុមគ្រួសារ តែខ្ញុំមានមោទនភាពណាស់ក្នុងតួនាទីរបស់ខ្ញុំ។ ខ្ញុំបានដើរតួយ៉ាងសំខាន់ក្នុងការត្រួសត្រាយផ្លូវសម្រាប់ឲ្យស្រ្តីខ្មែរដទៃទៀត។

១៣ ឧសភា ២០១៣ | ទេព សុវិចិត្រ

លោក ទេព សុវិចិត្រ មានអាយុ១៧ឆ្នាំ សព្វថ្ងៃនេះជាសិស្សនៅវិទ្យាល័យជាស៊ីម សន្ធរម៉ុក ថ្នាក់ទី១២។ លោកចូលចិត្តបច្ចេកវិទ្យាកុំព្យូទ័រ និងជាអ្នកសរសេរប្លុកដ៏ជំនាញម្នាក់។ លោកវិចិត្រ ជឿជាក់ថាបច្ចេកវិទ្យាមានអត្ថប្រយោជន៍ចំពោះសង្គម ដោយសារតែបច្ចេកវិទ្យានេះអាចផ្ដល់នូវភាពងាយស្រួលក្នុងការចែករំលែកចំណេះដឹង និងព័ត៌មាន ។

ទោះបីជាលោកកំពុងតែរៀននៅក្នុងវិទ្យាល័យនៅឡើយ តែលោកវិចិត្រ បានសរសេរប្លុកផ្ទាល់ខ្លួនមួយរួចទៅហើយ ដែលប្លុករបស់លោកគឺដើម្បីចែករំលែកព័ត៌មាន និងចំណេះដឹងទាក់ទងនឹងបច្ចេកវិទ្យា។ លោកវិចិត្រ ក៏បានសរសេរប្លុកផ្ទាល់ខ្លួនមួយដែលសរសេរអំពីជីវិតប្រចាំថ្ងៃ និងបទពិសោធន៍របស់លោក។

សាររបស់លោកវិចិត្រ ៖ “ទោះបីជាការចែករំលែកព័ត៌មាននៅក្នុងប្រទេសកម្ពុជានៅមានកម្រិត ខ្ញុំជឿជាក់ថាមនុស្សគ្រប់គ្នាមានចំណេះដឹងដែលអាចចែករំលែកបាន។ តាមរយៈការប្រើប្រាស់បណ្ដាញផ្សព្វផ្សាយសង្គម មនុស្សទាំងអស់អាចចែករំលែកព័ត៌មាន និងចូលរួមក្នុងការពិភាក្សាជាសាធារណៈ។ ខ្ញុំសង្ឃឹមថាមនុស្សជាច្រើន និងចាប់ផ្តើមសរសេរប្លុកផ្ទាល់ខ្លួន ពីព្រោះមនុស្សម្នាក់ៗមានរឿងរ៉ាវសំខាន់ៗដែលត្រូវចែករំលែក។”

១២ ឧសភា ២០១៣ | អ៊ុង ច័ន្ទសោភា

កញ្ញា អ៊ុង ច័ន្ទសោភា គឺជាអ្នកសារព័ត៌មាន ហើយកញ្ញាអាយុ ២៩ឆ្នាំ។ កញ្ញា ធ្វើការជាអ្នកផលិតកម្មវិធីក្នុងប៉ុស្តិ៍ទូរទស្សន៍ ស៊ីអិនស៊ី ដែលកញ្ញាដឹកនាំកម្មវិធីចំនួនពីរគឺ ៖ សេដ្ឋកិច្ចសកល និងសប្ដាហ៍នៃប្រទេសកម្ពុជា (ព័ត៌មានជាភាសាបារាំង)។ កាលពីឆ្នាំ ២០១០ កញ្ញា បានធ្វើដំណើរទៅប្រទេសបារាំងដើម្បីសិក្សាបន្តផ្នែកសារព័ត៌មាន។ កញ្ញាបានចំណាយពេលពីរឆ្នាំនៅទីនោះ ក្នុងសាលាជាន់ខ្ពស់ផ្នែកប្រព័ន្ធផ្សព្វផ្សាយទីក្រុងលីល (Lille) ដែលកញ្ញាមានជំនាញផ្នែកសារព័ត៌មានទូរទស្សន៍។ ក្នុងខែកញ្ញា ឆ្នាំ២០១២ កញ្ញាសោភា ទទួលបានបរិញ្ញាប័ត្រអនុបណ្ឌិត និងសម្រេចចិត្តត្រលប់មកប្រទេសកំណើតវិញ។

កញ្ញា សោភា បានទទួលរង្វាន់សេរីភាពសារព័ត៌មាន ក្នុងការប្រកួតឆ្នាំ២០០៩ ដែលរៀបចំដោយ អ្នកសារព័ត៌មានគ្មានព្រំដែន និងស្ថាប័នពីរទៀតនៃប្រទេសបារាំង។ កញ្ញា ទទួលបានរង្វាន់នេះគឺដោយសារតែអត្ថបទបែបអង្កេតរបស់កញ្ញា ស្ដីពីជនរងគ្រោះជាស្ត្រីក្នុងអំពើហិង្សាក្នុងគ្រួសារ។ អត្ថបទនេះត្រូវបានបោះពុម្ពផ្សាយក្នុងសារព័ត៌មានជាភាសាបារាំង កាំបូដ ស័រ។ ក្នុងឆ្នាំ ២០០៤ កញ្ញា បានចាប់ផ្តើមអាជីពជាអ្នកសារព័ត៌មាន ក្នុងសារព័ត៌មានកាំបូដ ស័រ។ ស្របពេលជាមួយគ្នាដែរ កញ្ញា ក៏បានធ្វើការជាអ្នកឆ្លើយឆ្លងព័ត៌មានឲ្យស្ថានីយវិទ្យុបារាំងអន្តរជាតិ។ ក្នុងអំឡុងពេលធ្វើការជាអ្នកសារព័ត៌មាន កញ្ញាសោភា បានសរសេរអត្ថបទបែបអង្កេតជាច្រើនដែលពាក់ព័ន្ធនឹងសិទ្ធិមនុស្ស និងភាពក្រីក្រ។ កញ្ញា ក៏បានឈ្នះរង្វាន់លេខបី ក្នុងការប្រកួតអត្ថបទបែបអង្កេតដែលរៀបចំដោយ ក្លឹបអ្នកកាសែតកម្ពុជា និងស្ថានទូតសហរដ្ឋអាមេរិកផងដែរ។

សាររបស់កញ្ញាសោភា៖ “ក្នុងនាមជាអ្នកសារព័ត៌មាន អ្នកគឺជាសាក្សីចំពោះអ្វីដែលកំពុងតែកើតឡើងក្នុងសង្គមរបស់អ្នក។ តាមរយៈការរាយការណ៍របស់អ្នក អ្នកអាចរួមចំណែកក្នុងការផ្លាស់ប្ដូរពិភពលោក។”

១១ ឧសភា ២០១៣ | គង់ សុឋានរិទ្ធ

លោក គង់ សុឋានរិទ្ធ ជានិពន្ធនាយក និងអ្នកសម្របសម្រួលនៅវិទ្យុសំឡេងសហរដ្ឋអាមេរិក (វីអូអេ) ហើយដែលលោកបានចូលធ្វើការជាមួយវិទ្យុនេះចាប់តាំងពីឆ្នាំ២០០៦មកម្លេះ។ លោកស្រលាញ់ការងារជាអ្នកសារព័ត៌មាន ដោយសារតែលោកបានជួបមនុស្សម្នាថ្មីៗជាច្រើន និងបានដឹងពីហេតុការណ៍នានាដែលបានកើតឡើង។

មុនពេលចូលធ្វើការជាមួយ វីអូអេ លោកបានធ្វើការជាមួយសារព័ត៌មានបារាំង កាំបូដស្វ័រ ទីភ្នាក់ងារព័ត៌មានស្វីសទស្សនាវដ្ដីអាកាសចរណ៍ និងវិទ្យុបារាំងអន្តរជាតិ។ ក្នុងគំនិតរបស់លោក អាជីពជាអ្នកសារព័ត៌មានមានការប្រឈមច្រើន ជាពិសេសក្នុងបរិបទសង្គមខ្មែរ។ ដោយសារតែការរឹតត្បិតលើសារព័ត៌មាន សមត្ថភាពមិនត្រូវបានគេឲ្យតម្លៃ ហើយការទន់ទេរទៅរកគណបក្សនយោបាយបានក្លាយជាគឺកត្តាចម្បងដែលកំណត់ពីភាពជោគជ័យក្នុងអាជីព។ ទោះបីជាយ៉ាងណាក៏ដោយ លោកសុឋានរិទ្ធិ នៅតែជាអ្នកតស៊ូមតិដ៏ខ្លាំងក្លាសម្រាប់សារព័ត៌មានសេរី និងជំរុញឲ្យអ្នកសារព័ត៌មានដទៃទៀតរក្សាវិន័យរបស់ខ្លួន។ លោកជឿជាក់ថាសារព័ត៌មាន ជាកម្លាំងដ៏ខ្លាំងមួយ ដែលអាចប្រើប្រាស់ដើម្បីអភិវឌ្ឍន៍សង្គមកម្ពុជា។

សាររបស់លោក “អ្នកសារព័ត៌មានត្រូវពង្រឹងវិជ្ជាជីវៈ និងពង្រឹងនូវការអនុវត្តន៍ក្រមសីលធម៌របស់ខ្លួន ដើម្បីលើកតម្លៃខ្លួនឯងនៅក្នុងសង្គម។ អ្នកសារព័ត៌មានត្រូវចេះយកវិជ្ជាជីវៈមកប្រើឲ្យចំគោលដៅ។ សម្រាប់អ្នកនយោបាយវិញក៏មិនត្រូវគេចវេះពីអ្នកសារព័ត៌មាននោះដែរ តែត្រូវតែហ៊ានមើលមុខអ្នកសារព័ត៌មាន ហើយនិយាយជាមួយអ្នកសារព័ត៌មានដោយត្រង់ៗ។ ពេលអ្នកនយោបាយ រើសអើងអ្នកសារព័ត៌មាន តម្លៃរបស់ប្រព័ន្ធផ្សព្វផ្សាយត្រូវបានធ្លាក់ចុះ។”

១០ ឧសភា ២០១៣ | អឿង បុណ្យសុវត្ថារី

កញ្ញា អឿង បុណ្យសុវត្ថារី ហៅ សុវត្ថារី អាយុ២៤ឆ្នាំ ជានិស្សិតដែលបានបញ្ចប់ថ្នាក់បរិញ្ញាបត្រផ្នែកភាសាអង់គេ្លស និងជាគ្រូបង្រៀនភាសាអង់គ្លេស និងជាជំនួយការផ្នែកអប់រំ នៃសាកលវិទ្យាល័យបញ្ញាសាស្ត្រ។

ដោយសារតែចំណូលចិត្ត កញ្ញាសុវត្ថារី បានចាប់ផ្តើមការសរសេរប្លុកផ្ទាល់ខ្លួន ក្នុងឆ្នាំ២០០៩ មានឈ្មោះថា “បុត្រីខ្មែរ”។ អ្វីដែលជំរុញឲ្យនាងសរសេរប្លុក គឺដោយសារការសង្កេតផ្ទាល់ខ្លួន ចំពោះជីវភាពប្រចាំថ្ងៃរបស់ប្រជាពលរដ្ឋកម្ពុជានៅទីក្រុងភ្នំពេញ។ ប្លុករបស់កញ្ញា ផ្តោតលើប្រធានបទ ដូចជា វប្បធម៌ខ្មែរ អក្សរសាស្ត្រជាតិ និងអន្តរជាតិ សិល្បៈ ចំម្រៀង ក៏ដូចជាក្តីសុបិន និងសេចក្តីប្រាថ្នារបស់នាងផងដែរ។ គោលដៅចម្បងមួយនៃការសរសេរប្លុករបស់នាងគឺចង់បង្ហាញ និងចែករំលែកគំនិតរបស់នាងស្ដីពីជីវិតប្រចាំថ្ងៃរបស់ប្រជាពលរដ្ឋកម្ពុជា។ លើសពីនេះទៅទៀត កញ្ញាសុវ៉ាតថារី ក៏ជាអ្នកគូរគំនូរត្លុក និងជាអ្នកថតរូបផងដែរ។ ប្លុករូបត្លុករបស់កញ្ញាគឺ “Camtoontista” និងប្លុករូបថតនៅលើ Tumblr មានឈ្មោះថា “Dear Photodiary”។ កញ្ញាក៏មានចំណង់ចំណូលចិត្តផ្នែកសរសេរបែបច្នៃប្រឌិតផងដែរ។

សាររបស់កញ្ញាសុវត្ថារី “កិច្ចការដែលខ្ញុំចូលចិត្តធ្វើទាំងអស់ ត្រូវបានដាក់បង្ហាញនៅក្នុងប្លុករបស់ខ្ញុំ (បុត្រីខ្មែរ) ព្រោះនេះគឺជាវិធីមួយដែលខ្ញុំអាចទំនាក់ទំនងជាមួយមនុស្សគ្រប់គ្នាបាន”។

៩ ឧសភា ២០១៣ | អ៊ូ រិទ្ធី

លោក អ៊ូ រិទ្ធី កើត និងធំធាត់ឡើងនៅក្នុងតំបន់ដាច់ស្រយាលមួយនៅក្នុងខេត្តពោធិ៍សាត់ ប្រទេសកម្ពុជា។ លោកមានអារម្មណ៍ថាមានសំណាងណាស់ដែលបានទទួលឱកាសក្នុងការអប់រំនៅមហាវិទ្យាល័យហ្វើហ្គូសុន សាកលវិទ្យាល័យពូណេ ប្រទេសឥណ្ឌា។ លោកបានបញ្ចប់ថ្នាក់បរិញ្ញាប័ត្រ ផ្នែកវិទ្យាសាស្ត្រនយោបាយនៅឆ្នាំ២០១១នៅសាកលវិទ្យាល័យពូណេ។ ការសិក្សានេះនឹងមិនអាចធ្វើទៅបាននោះទេ ប្រសិនបើគ្មានការឧបត្ថម្ភដ៏សប្បុរសរបស់ក្រុមប្រឹក្សាឥណ្ឌាសម្រាប់ទំនាក់ទំនងផ្នែកវប្បធម៌។

បន្ទាប់ពីបញ្ចប់ថ្នាក់បរិញ្ញាប័ត្រក្នុងខែកក្កដា ឆ្នាំ២០១១ រិទ្ធីត្រលប់មកប្រទេសកម្ពុជា ហើយបានធ្វើកម្មសិក្សារយៈពេល ៣ខែជាមួយ មូលនិធិ ខុនរ៉ាដ អាដិនណៅអ៊ែរនៅប្រទេសកម្ពុជា។ រិទ្ធីចំណាយពេលបីខែជាមួយ មូលនិធិខុនរ៉ាដ និងមានទំនាក់ទំនងយ៉ាងជិតស្និទ្ធជាមួយនឹងកម្មវិធី “យុវជនក្នុងវិស័យនយោបាយ” នៃមូលនិធិផ្នែកនយោបាយរបស់ប្រទេសអាល្លឺម៉ង់។ លោកចូលរួមចំណែកក្នុងកម្មវិធីនេះតាមរយៈការអប់រំយុវជនពីរឿងនយោបាយ។ ជាលទ្ធផល អ្នកចូលរួមក្នុងកម្មវិធីនោះ ទទួលបានចំណេះដឹងទូលំទូលាយអំពីវប្បធម៌នយោបាយប្រទេសកម្ពុជា និងត្រូវបានផ្ដល់ជូននូវឧបករណ៍ចាំបាច់សម្រាប់អនុវត្តកំណែទម្រង់ផ្នែកនយោបាយជាវិជ្ជមាន។ បន្ទាប់ពីបានបញ្ចប់កម្មសិក្សាជាមួយនឹងមូលនិធិ ខុនរ៉ាដរួចមក រិទ្ធីបានធ្វើការជាមន្ត្រីផ្នែកអង្កេត នៅគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា(ខុមហ្វ្រែល)។ ក្នុងអំឡុងពេលនេះ លោកទទួលខុសត្រូវក្នុងការសង្កេតមើលការបោះឆ្នោតនៅប្រទេសកម្ពុជា ក៏ដូចជាតាមដានរដ្ឋាភិបាល សមាជិកសភា និងសារព័ត៌មាននៅប្រទេសកម្ពុជា។ បច្ចុប្បន្ន រិទ្ធីមានប្លុកផ្ទាល់ខ្លួន ដែលក្នុងប្លុកនោះមានសរសេរអំពីបញ្ហានយោបាយ និងបញ្ហាសង្គមនៅកម្ពុជា។

សាររបស់រិទ្ធី “ សុបិនរបស់ខ្ញុំគឺរួមចំណែកក្នុងការផ្លាស់ប្តូរជាវិជ្ជមានលើវិស័យសេដ្ឋកិច្ច ច្បាប់ នយោបាយ និងសង្គម នៅក្នុងប្រទេសកម្ពុជា ដោយពឹងផ្អែកលើគោលការណ៍អហិង្សា។”

៨ ឧសភា ២០១៣ | កើត ចន្ទ្រា

កញ្ញាកើត ចន្ទ្រា ជាអ្នកយកព័ត៌មានឯករាជ្យ ឲ្យទស្សនាវដ្តីប្រជាប្រិយ និងជានិស្សិតផ្នែកសារព័ត៌មាននៅសាកលវិទ្យាល័យភូមិន្ទភ្នំពេញ ក្នុងដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍។ កញ្ញាសម្រេចចិត្តសិក្សាផ្នែកសារព័ត៌មាន ដោយសារតែកញ្ញាចង់ចូលរួមចំណែកដើម្បីធ្វើឲ្យសា្ថនភាពសេរីភាពសារព័ត៌មាននៅកម្ពុជាកាន់តែប្រសើរឡើង។ កញ្ញាក៏បានឃើញថាមនុស្សភាគច្រើននៅប្រទេសកម្ពុជាមើលឃើញថាការងារអ្នកកាសែតជាការងារសម្រាប់តែមនុស្សប្រុស។ កញ្ញាមានបំណងលុបបំបាត់គំនិតនេះ ហើយការជ្រើសរើសរៀនផ្នែកសារព័ត៌មាន កញ្ញាក៏សង្ឃឹមថានឹងអាចជួយលើកទឹកចិត្តឲ្យស្ត្រីផ្សេងទៀត ហ៊ានសម្រេចចិត្តប្រឡូកចូលក្នុងវិស័យសារព័ត៌មានផងដែរ។

កញ្ញាចន្ទ្រា មានបទពិសោធន៍ជាច្រើនក្នុងវិស័យសារព័ត៌មាន និងទូរគមនាគមន៍។ កាលពីមុន កញ្ញាធ្លាប់ធ្វើជាបុគ្គលិកហាត់ការម្នាក់ក្នុងផ្នែកទំនាក់ទំនងនៃអង្គការកម្មវីធីអភិវឌ្ឈន៍ធនធានយុវជន ។ កញ្ញា ក៏ធ្លាប់ជាពិធីករក្នុង វិទ្យុ FM៩១មេហ្កាហឺត ក្នុងឆ្នាំ២០១០។ ក្រោយមកទៀត កញ្ញាបានក្លាយទៅជាអ្នកបកប្រែ និងអ្នកយកព័ត៌មានប្រចាំស្ថានីទូរទស្សន៍អាស៊ីអាគ្នេយ៍។ កញ្ញាក៏បានសរសេរអត្ថបទឲ្យ ទស្សនាវដ្តី LIFT ផ្តោតសំខាន់លើយុវជន និងសរសេរអត្ថបទឲ្យអង្គការសប្បុរស Trocaire លើប្រធានបទទប់សា្កត់អំពើហ្សិាងក្នុងគ្រួសារ។ ចន្ទ្រា ក៏បានសរសេរអត្ថបទក្នុងប្លុកផ្ទាល់ខ្លួនគឺ chumreapsour.wordpress.com ដែលប្លុកនោះសរសេររៀបរាប់ពីបទពិសោធន៍របស់កញ្ញា និងមតិយោបល់របស់យុវជនដទៃទៀតពាក់ព័ន្ធ នឹងបញ្ហាសង្គមផ្សេងៗ។ ប្លុកនោះក៏មានដាក់បញ្ជូលនូវរូបថតដែលជាស្នាដៃរបស់កញ្ញាផងដែរ។

សាររបស់ចន្ទ្រា “ក្នុងពេលអនាគត ខ្ញុំចង់ក្លាយជាអ្នកសារព័ត៌មានអាជីព។ ខ្ញុំមានបំណងចង់ស្វែងរកការពិត ធ្វើជាស្ពានរវាងប្រជាពលរដ្ឋ និងរដ្ឋាភិបាល និងជាសរសេរព័ត៌មានត្រឹមត្រូវ និងមិនលម្អៀងសម្រាប់សារធាណជន។ ខ្ញុំក៏ចង់លុបបំបាត់នូវទស្សនៈដែលថា ស្រី្តខ្មែរមិនមានសមត្ថភាពដូចបុរស។ ខ្ញុំគិតថាយើងត្រូវការសមភាពយេនឌ័រក្នុងការអភិវឌ្ឍន៍ខ្លូនឯងនិងសង្គម ខ្ញុំសង្ឃឹមថាខ្ញុំអាចលើកទឹកចិត្តដល់ស្ត្រីផ្សេងទៀតក្នុងការបន្តការងារប្រភេទនេះតទៅទៀត។

៧ ឧសភា ២០១៣ | គឹម ធីតាកល្យាណី

លោកស្រី គឹម ធីតាកល្យាណី គឺជាអ្នកផលិតកម្មវិធីឯករាជ្យម្នាក់។ លោកស្រីមានបទពិសោធន៍ជាង១២ឆ្នាំ ក្នុងការផលិតកម្មវិធីទូរទស្សន៍ និងជាអ្នកផលិតឈុតអប់រំសុខភាពខ្លីៗ ឈុតផ្សាយពាណិជ្ជកម្ម ភាពយន្តឯកសារ និងកម្មវិធីទូរទស្សន៍ផ្សេងជាច្រើនទៀត។ លោកស្រីក៏ធ្លាប់ធ្វើការជាមួយនឹងស្ថាប័នល្បីៗមួយចំនួនដូចជា ប៊ីប៊ីស៊ី វើល សើវីស ត្រាស់ អង្គការផ្សព្វផ្សាយអប់រំសុខភាពកម្ពុជា (ឆែមស៍) អង្គការ មូលនិធិសកលសម្រាប់អភិរក្សធម្មជាតិ និង កម្មវិធីអភិវឌ្ឍន៍អង្គការសហប្រជាជាតិ (យូអិនឌីភី) ផងដែរ។

ចាប់ពី ២០១០ ដល់ ខែមិនា ឆ្នាំ២០១៣ លោកស្រីបានធើ្វការជាអ្នកគ្រប់គ្រងផលិតកម្មវិធីទូរទស្សន៍ ឲ្យអង្គការយូអិនឌីភី និងទទួលខុសត្រូវផលិតកម្មវិធី “សមធម៌” ជាកម្មវិធីទូរទស្សន៍មានគោលបំណងពង្រឹងលិទ្ធប្រជាធិបតេយ្យក្នុងប្រទេសកម្ពុជា (www.equitycam.tv) ។ កម្មវិធីសមធម៌ ភាគច្រើនបានជះឥទ្ធិពលដល់រដ្ឋាភិបាល ក្នុងការធ្វើសេចក្ដីសម្រេចចិត្តដែលទាក់ទងនឹងបញ្ហាសំខាន់ៗ មួយចំនួនដូចជាការផ្តល់ដីសម្បទានសង្គមកិច្ច ការជីករ៉ែ ការសង់លំនៅដ្ឋានសម្រាប់ប្រជាជនដែលត្រូវបណ្ដេញចេញ គ្រោះថ្នាក់ចរាចរណ៍ និងហាមឃាត់ការផ្សព្វផ្សាយគ្រឿងស្រវឹង។ កម្មវិធីទូរទស្សន៍ និងយុទ្ធនាការរបស់លោកស្រី កល្យាណី គឺភាគច្រើនទទួលបានជោគជ័យជាងកម្មវិធីនានានៅក្នុងប្រទេសកម្ពុជា។ ឧទារហណ៍នៃភាពជោគជ័យរបស់លោកស្រី មានដូចជា “សុខភាពល្អ អនាគតបវររុងរឿង” កម្មវិធី “បេសកកម្មតន្រី្ត” និងកម្មវិធី “សមធម៌” ។

សាររបស់លោកស្រីកល្យាណី “ខ្ញុំមានបំណងប្រាថ្នាយ៉ាងមុះមុតចំពោះអាជីពជាអ្នកសារព័ត៌មាន និងជឿជាក់ថាប្រព័ន្ធផ្សព្វផ្សាយអាចដើរតួនាទីយ៉ាងសំខាន់ ដើម្បីផ្លាស់ប្ដូរពិភពលោក និងធ្វើឲ្យពិភពលោកក្លាយទៅជាកន្លែងមួយដ៏ប្រសើរឡើង។”

៦ ឧសភា ២០១៣ | អ៊ឹង ចន្ថន

លោក អ៊ឹង ចន្ថន ហៅ អ៊ឹង ប៊ុនថន បច្ចុប្បន្នជានិពន្ធនាយកនៃវិទ្យុសំឡេងប្រជាធិបតេយ្យ (វីអូឌី)។ លោកបានកើតនៅក្នុងគ្រួសារកសិករមួយ ក្នុងខេត្តកំពតជាប់ព្រំដែនកម្ពុជា-វៀតណាម។

តាំងពីនៅក្មេង លោកតែងតែចូលចិត្តស្ដាប់ និងធ្វើត្រាប់តាម អ្នកសារព័ត៌មានក្នុងវិទ្យុអន្តរជាតិនានា ដូចជា វិទ្យុសំឡេងសហរដ្ឋអាមេរិក វិទ្យុអាស៊ីសេរី និងវិទ្យុបារាំងអន្តរជាតិ។ ចំណាប់អារម្មណ៍ពីកុមារភាព បាននាំឲ្យចន្ថន សម្រេចចិត្តធ្វើការជាអ្នកយកព័ត៌មាន។ ក្នុងឆ្នាំ ២០០៤ លោកបានមកសិក្សានៅភ្នំពេញ។ លោកត្រូវធ្វើការក្រៅម៉ោងដើម្បីផ្គត់ផ្គង់ការសិក្សារបស់លោក។ បន្ទាប់ពី បញ្ចប់ការសិក្សា លោកបានចូលរួមវគ្គបណ្ដុះបណ្ដាលរយៈពេល ៣ខែ ដែលរៀបចំដោយ មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ។ បន្ទាប់មកគាត់ដាក់ពាក្យចូលធ្វើការជាមួយ វីអូឌី ហើយត្រូវបានគេជ្រើសរើសជាបុគ្គលិក។

សាររបស់លោក ចន្ថន ៖ “ក្នុងនាមជាអ្នកសារព័ត៌មាន គ្មានមួយនាទីណាដែលត្រូវភ្លេចព័ត៌មាន គ្មានមួយនាទីណាដែលត្រូវធ្វើមិនដឹងមិនឮចំពោះព្រឹត្តិការណ៍ដែលកើតឡើងនោះទេ។ អ្វីដែលខ្ញុំបានដឹង សាធារណជនគួរតែបានដឹងផងដែរ។”

៥ ឧសភា ២០១៣ | ហង្ស ចក្រា

លោក ហង្ស ចក្រា ហៅ ជ័យ ឧត្ដម ជាចាងហ្វាងការផ្សាយ និងនិពន្ធនាយកនៃ សារព័ត៌មាន “ខ្មែរម្ចាស់ស្រុក”។ លោកបានទទួលពានរង្វាន់ពី អង្គការអ្នកឃ្លាំមើលសិទ្ធិមនុស្ស ក្នុងឆ្នាំ២០១១។ លោកបានចាប់ផ្តើមការងារ ក្នុងឆ្នាំ១៩៩៤ ធ្វើជាអ្នកយកព័ត៌មានឲ្យសារព័ត៌មានមួយចំនួន ហើយក្នុងឆ្នាំ១៩៩៨ លោកបានបោះពុម្ពកាសែតផ្ទាល់ខ្លួន ឈ្មោះ “សម្លេងខ្មែរស្នេហាជាតិ”។ ចុងឆ្នាំ២០០០ លោកបានធ្វើក្លាយជាអ្នកនិពន្ធអត្ថបទផ្នែកនយោបាយឲ្យ សារព័ត៌មានមនសិកាខ្មែរ ហើយក្នុងឆ្នាំ ២០០៧ លោកបានបង្កើតសារព័ត៌មាន “ខ្មែរម្ចាស់ស្រុក”។

រយៈពេល ២០ឆ្នាំ សម្រាប់បទពិសោធន៍ជាអ្នកសារព័ត៌មាន លោកទទួលការគំរាមកំហែងរាប់មិនអស់។ លោកក៏ធ្លាប់ត្រូវបានមន្រ្តីរដ្ឋាភិបាលថ្នាក់ខ្ពស់ប្ដឹងពីបទបរិហារកេរ្តិ៍ក្នុងឆ្នាំ២០០៨ និងបទបរិហាកេរ្តិ៍ និងផ្សាយព័ត៌មានមិនពិតក្នុងឆ្នាំ២០០៩។ ក្នុងនាមជាអ្នកសារព័ត៌មានកម្ពុជា លោកជឿជាក់ថា អ្នកសារព័ត៌មានប្រឈមនឹងការគំរាមកំហែង ការចាប់ខ្លួន ហើយពេលខ្លះទៀតគឺការសម្លាប់ ដែលនេះជាការប៉ុនប៉ងបំបាក់ស្មារតីរបស់អ្នកសារព័ត៌មាន។

សាររបស់លោកចក្រា ៖ “ខ្ញុំសូមអំពាវនាវឲ្យបញ្ឈប់ការគំរាមកំហែងគ្រប់រូបភាពមកលើអ្នកសារព័ត៌មាន ហើយនាំជនដៃដល់ដែលសម្លាប់អ្នកសារព័ត៌មានទាំងអស់មកទទួលទោសតាមច្បាប់ ដើម្បីបញ្ចប់ វប្បធម៌និទណ្ឌភាពនៅកម្ពុជា។ សម្រាប់អ្នកសារព័ត៌មានទាំងអស់ សូមមេត្តាក្លាហានឡើង ដើម្បីផ្ដល់ព័ត៌មានពិតជូនសាធារណជន ហើយសូមកុំខ្លាចការគំរាមកំហែងរបស់បុគ្គលណាឲ្យសោះ។”

៤ ឧសភា ២០១៣ | បូ សាវី

លោក បូ សាវី បច្ចុប្បន្នធ្វើការជាអ្នកយកព័ត៌មានឯករាជ្យ ឲ្យវិទ្យុសំឡេងប្រជាធិបតេយ្យ (វីអូឌី) ប្រចាំនៅខេត្តសៀមរាប ជាកន្លែងដែលលោកបានចូលធ្វើការជាអ្នកយកព័ត៌មានស្ម័គ្រចិត្ត ចាប់ពីឆ្នាំ ២០១១ មកទល់ឆ្នាំ២០១២។ លោក បូ សាវី សម្រេចចិត្តចាប់អាជីពជាអ្នកសារព័ត៌មាន ដោយសារតែចំណាប់អារម្មណ៍លើការអានសារព័ត៌មាន និងទទួលយកនូវព័ត៌មានថ្មីៗ។ លោកក៏មានបំណងចង់ ផ្ដល់ព័ត៌មានជូនទៅសាធារណជនអំពីស្ថានភាពបច្ចុប្បន្នក្នុងជីវិតប្រចាំថ្ងៃរបស់ពួកគេ។

លោកមានបទពិសោធន៍ចំនួន ៥ឆ្នាំ ជាអ្នកយកព័ត៌មានឲ្យស្ថានីយវិទ្យុ។ ដំបូងឡើយ លោកចាប់ផ្តើមធ្វើការជាអ្នកយកព័ត៌មានឲ្យសម្ព័ន្ធអ្នកសារព័ត៌មាននៅខេត្តសៀមរាប បន្ទាប់មកលោកក៏ធ្វើការនៅ វិទ្យុក្រុងអង្គរ អែហ្វអ៊ឹម ៨៩.៥ មានទីតាំងនៅខេត្តសៀមរាប ហើយស្របពេលជាមួយគ្នានោះដែរ លោកក៏បានបម្រើការឲ្យ វិទ្យុខ្មែរ ពិភពលោក នៅក្នុងសហរដ្ឋអាមេរិក។ ក្នុងឆ្នាំ២០១១ លោកបានទទួលជ័យលាភីចំណាត់ថ្នាក់លេខមួយ ខាងសរសេរសារព័ត៌មានផ្នែកសេរីភាពបញ្ចេញមតិ រៀបចំដោយ មជ្ឈមណ្ឌលកម្ពុជាដើម្បី ប្រព័ន្ធផ្សព្វផ្សាយឯករាជ្យ។

សាររបស់លោកសាវី ៖ “ធ្វើជាអ្នកសារព័ត៌មានជួបប្រទះនូវការប្រថុយគ្រោះថ្នាក់ជាច្រើន ខ្ញុំផ្ទាល់ធ្លាប់រងការគំរាមកំហែង និងការជេរប្រមាថពីមន្ត្រីរដ្ឋាភិបាល ឬអ្នកមានអំណាច នៅពេលដែលខ្ញុំសរសេរអត្ថបទពាក់ព័ន្ធនឹងទង្វើខុសច្បាប់របស់ពួកគេ។ ខ្ញុំក៏ចង់បង្ហាញ ប្រាប់ដល់រដ្ឋាភិបាល និងសាធារណជនដើម្បីឲ្យទទួលស្គាល់ថា អ្នកសារព័ត៌មានមិនមែនជាអ្នកបង្កបញ្ហាដល់សង្គមនោះទេ ប៉ុន្តែតួនាទីរបស់យើងគឺ ធ្វើជាស្ពានសម្រាប់បញ្ជូនសារពីប្រជាពលរដ្ឋទៅរដ្ឋាភិបាល ពីរដ្ឋាភិបាលទៅប្រជាពលរដ្ឋ ។

៣ ឧសភា ២០១៣ | ឃុន អាឡិច

លោក ឃុន អាឡិច គឺជាអ្នកកាសែត និងជាអ្នកផ្សាយសំឡេងជនជាតិខ្មែរ ធ្វើការឲ្យវិទ្យុអូស្រ្ដាលី ដែលជាផ្នែកមួយនៃសាជីវកម្មសោតទស្សន៍អូស្រ្ដាលី (ABC)។

ការងាររបស់លោកអាឡិច បានផ្តល់ឱកាសឲ្យលោកធើ្វការភ្ជាប់ទំនាក់ទំនង និងរួមចំណែកដោយប្រើសមត្ថភាពលោកផ្ទាល់ ជូនដល់ប្រទេសកម្ពុជាដែលជាប្រទេសកំណើតរបស់លោក បើទោះបីជាលោកចាត់ទុកថាប្រទេសអូស្រ្តាលីជាផ្ទះទៅហើយក៏ដោយ។ លោកអាឡិច បានបញ្ចប់ថា្នក់បរិញ្ញបត្រវិស្វកម្ម ផ្នែកបច្ចេកវិទ្យាអ៊ីនធឺណិត និងទូរគមនាគមន៍ ពីសាកលវិទ្យាល័យម៉ែលប៊ិន ប៉ុនែ្តលោកអាឡិច បានចាប់យកវិស័យផ្សព្វផ្សាយ និងបានកា្លយជាអ្នកផ្សាយសំឡេងវិទ្យុ ព្រោះលោកគិតថាតួនាទីសំខាន់របស់ប្រព័ន្ធផ្សព្វផ្សាយគឺធ្វើឲ្យមានការអភិវឌ្ឍន៍ប្រទេស។ លោកអាឡិចក៏បានបញ្ចប់ថា្នក់អនុបណ្ឌិតផ្នែកការអភិវឌ្ឍន៍អន្តរជាតិ និងមានចំណង់ចំណូលចិត្តធ្វើការងារស្ម័គ្រចិត្តក្នុងពេលទំនេររបស់លោកផងដែរ។ ទស្សនវិជ្ជាមួយដែលលោកប្រកាន់ភ្ជាប់នោះគឺការរៀនសូត្រពេញមួយជីវិត ដូច្នេះធ្វើឲ្យលោកបន្តការសិក្សាថា្នក់អនុបណ្ឌិតផ្នែក ប្រព័ន្ធផ្សព្វផ្សាយ និងសារគមនាគមន៍នៅទីក្រុងម៉ែលប៊ិន ដែលជាទីកនែ្លងស្នាក់អាស្រ័យរបស់លោក។

លោកអាឡិច និយាយថា “ខ្ញុំមានកិត្តិយសណាស់ ដែលអាច បម្រើប្រយោជន៍សាធារណៈសម្រាប់ប្រទេសកម្ពុជា និងប្រជាពលរដ្ឋកម្ពុជានៅជុំវិញពិភពលោកតាមរយៈការផ្តល់ជាដំណឹង និងព័ត៌មានដែលអាចជួយពួកគេធ្វើការសម្រេចចិត្តបានត្រឹមត្រូវពាក់ព័ន្ធនឹងរឿងរ៉ាវដែលមានឥទ្ធិពលលើជីវភាពប្រចាំថ្ងៃរបស់ពួកគេ។ ការអភិឌ្ឍន៍សង្គមមួយនឹងត្រូវរាំងស្ទះ ប្រសិនបើប្រជាពលរដ្ឋក្នុងប្រទេសនោះមិនត្រូវបានអនុញ្ញាតឲ្យនិយាយ គិត និងបញ្ចេញមតិដោយសេរី។ ប្រព័ន្ធផ្សព្វផ្សាយគឺជាវេទិកាមួយសម្រាប់ប្រជាពលរដ្ឋក្នុងការបង្ហាញនូវទស្សនៈ គំនិត ទៅលើបញ្ហាដែលពួកគេរងផលប៉ះពាល់ ហើយស្របពេលជាមួយគ្នានោះដែរ គឺធ្វើការផ្ដល់នូវព័ត៌មានត្រឹមត្រូវ និងមិនលម្អៀង។ ប្រព័ន្ធផ្សព្វផ្សាយពិតជាមានសារៈសំខាន់ណាស់ ក្នុងការធ្វើឲ្យបុគ្គលមានអំណាចទទួលខុសត្រូវចំពោះគោល-នយោបាយ និងការសម្រេចចិត្តរបស់ពួកគេដែលមានឥទ្ធិពលមកលើជីវភាពប្រចាំថ្ងៃរបស់ប្រជាពលរដ្ឋ។”

២២​​ ឧសភា ២០១៣ | ហេង​ ស៊ីនិត្យ

២១ ឧសភា ២០១៣ | ពុយ គា​

២០ ឧសភា ២០១៣ | ប៉ែន ​សមិទ្ធិ