អ្នកស្រី លឹម សូលីន ជាសកម្មជនសង្គម សិល្បករអាយ៉ៃ (ដែលគេស្គាល់ថា «នាងស៊ូស៊ូ») អ្នកនិពន្ធរឿង និងជាសហគ្រិនសង្គម។ អ្នកស្រីរស់រាយរាក់ទាក់ជាមួយមនុស្សគ្រប់រូប និងជាអ្នកដឹកនាំ អ្នកអប់រំ សកម្មជន សិល្បករ និងសហគ្រិនដែលមានភាពច្នៃប្រឌិត។ អ្នកស្រី សូលីន បានបង្កើតសហគ្រាសសង្គមដែលមានតួនាទីផ្តល់ប្រឹក្សាផ្នែកយុទ្ធសាស្រ្តដោយផ្តោតលើការគៀងគរថ្នាក់ដឹកប្រកបដោយគុណតម្លៃរួម ក្នុងចំណោមអ្នកដឹកនាំមកពីចម្រុះវិស័យ ដើម្បីឲ្យមានការផ្លាស់ប្តូរជាវិជ្ជមាន។ អ្នកស្រី សូលីន ក៏បានចូលរួមក្នុងគម្រោង P4 ដែលមានឥទ្ធិពលខ្លាំងនៅក្នុងប្រទេសកម្ពុជា និងនៅទូទាំងតំបន់អាស៊ីប៉ាស៊ីហ្វិក ក្នុងនោះមានដូចជាផ្នែកថាមពល ហេដ្ឋារចនាសម្ព័ន្ធ ការថែទាំសុខុមាលភាព ឧស្សាហកម្មច្នៃប្រឌិត និងអភិវឌ្ឍន៍ជំនាញនាពេលអនាគត។ អ្នកស្រី សូលីន មានបទពិសោធន៍ជាអ្នកសម្រុះសម្រួលដែលផ្តោតលើការសម្របសម្រួលឱ្យមានការបង្កើតទីសុវត្ថិភាពរួមគ្នា និងដំណើរការប្រកបដោយតម្លាភាពសម្រាប់ការសន្ទនាប្រកបដោយអត្ថន័យ។ យុទ្ធវិធីបាននាំឱ្យមានការដោះស្រាយប្រកបដោយជោគជ័យនូវទំនាស់ដែលមានលក្ខណៈស្មុគស្មាញជាច្រើនរវាងសហគមន៍និងសាជីវកម្មពហុជាតិ។ ក្នុងរយៈពេលជាង២០ឆ្នាំកន្លងមកនេះ អ្នកស្រីបានកាន់តួនាទីជាអ្នកដឹកនាំជាន់ខ្ពស់ និងតម្រង់ទិសការអនុវត្តគោលនយោបាយនៅក្នុងស្ថាប័នរអភិវឌ្ឍន៍អន្តរជាតិនានាក្នុងប្រទេសកម្ពុជា នៅតំបន់អាស៊ី អឺរ៉ុប និងសហរដ្ឋអាមេរិក៕

អាត សុធាវី គឺជាស្ថាបនិក Think Plastic ដែលជាយុទ្ធនាការ អប់រំផ្សព្វផ្សាយអំពីបរិស្ថាន ដែលផ្តោតសំខាន់ទៅលើផលប៉ះពាល់នៃការ ប្រើប្រាស់ប្លាស្ទិកដែលប្រើតែម្តងបោះចោល និង ធ្វើការលើកទឹកចិត្តឲ្យប្រជាជនកម្ពុជា ចូលរួមកាត់បន្ថយការប្រើប្រាស់ និង ចូលរួមការការពារបរិស្ថាន។ សុធាវីមានបទពិសោធន៌ជាង ១៥ ឆ្នាំលើផ្នែក ប្រព័ន្ធផ្សព្វផ្សាយ និង ទំនាក់ទំនង ជាអ្នកផ្តល់ប្រឹក្សា និង បង្ហាត់បង្ហាញជំនាញលើផ្នែក ការង្កើតមាតិការ និង ការផលិតវីដេអូ ។

សុធាវី ធ្លាប់ធ្វើការជាមួយ អង្គការក្នុងស្រុក និង ក្រៅរដ្ឋាភិបាល ក្នុង ប្រទេសកម្ពុជា និង ប្រទេសជាច្រើនក្នុងតំបន់អាស៊ីអាគ្នេយ៍ និង ប៉ាស៊ីហ្វិក។សុធាវីមានសម្ធិផលច្រើនក្នុងការធ្វើការងារសង្គម ហើយទទួលបានពានរង្វាន់ ស្ត្រីឆ្នើមប្រចាំតំបន់អាស៊ីអាគ្នេយ៍ ផ្នែកប្រព័ន្ធផ្សព្វផ្សាយ និង ទំនាក់ទំនង ក្នុង ឆ្នាំ 2020 និង បណ្ណសរសើរមេត្រីភាពបរិស្ថាន ឆ្នាំ ២០១៩ ពីក្រសួងបរិស្ថាន។

លោក ប៊ុន លឹមហួរ គឺជាអ្នកជំនាញផ្នែកសុខភាពផ្លូវចិត្ត ជាមួយនឹងបទពិសោធន៍ជាង២០ឆ្នាំ ក្នុងការតស៊ូលះបង់កម្លាំងកាយចិត្តចំពោះការលើកកម្ពស់ការថែទាំសុខភាពផ្លូវចិត្ត និងការពង្រឹងប្រព័ន្ធសុខភាពនៅកម្ពុជា។ លោក លឹមហួរ មានជំនាញខាងការត្រួតពិនិត្យការប្រឹក្សា ការបណ្តុះបណ្តាល និងការសម្របសម្រួលគម្រោងផ្នែកសុខភាពផ្លូវចិត្ត និងជំនួយចិត្តសង្គម ដោយលោក បានដឹកនាំនិស្សិតថ្នាក់អនុបណ្ឌិត និងផ្តល់នូវការណែនាំ អ្នកធ្វើការសង្គម អ្នកផ្តល់ប្រឹក្សា និងអ្នកចិត្តសាស្រ្ត ផងដែរ។ លោក លឹមហួរ ជាមនុស្សពូកែខាងទំនាក់ទំនង ដោយបានចូលរួមក្នុងសន្និសីទអន្តរជាតិ រួមទាំងសន្និសីទសុខភាពផ្លូវចិត្តអាស៊ីអាគ្នេយ៍ និងសន្និសីទអន្តរជាតិស្តីពីចិត្តវិទ្យា ការប្រឹក្សា និងការអប់រំ (ICPCE ២០១៩)។ ក្នុងនាមជាសមាជិកនៃសមាគមចិត្តសាស្រ្តអាមេរិក (សមាជិកភាព APA: ២០២៥) លោក លឹមហួរ ប្តេជ្ញាចិត្តក្នុងការលើកកម្ពស់ស្តង់ដារសុខភាពផ្លូវចិត្តជាសកល។ បន្ថែមពីលើជំនាញព្យាបាលផ្លូវចិត្ត លោក លឹមហួរ បានចូលរួមយ៉ាងសកម្មក្នុងការកសាងសន្តិភាព និងគំនិតផ្តួចផ្តើមភាពជាអ្នកដឹកនាំយុវជនតាំងពីឆ្នាំ២០០៥ ដោយធ្វើការលើកកម្ពស់ភាពធន់ និងការអភិវឌ្ឍសហគមន៍។ លោក លឹមហួរ បានបញ្ចប់ថ្នាក់បរិញ្ញាបត្រផ្នែកគ្រប់គ្រង និងថ្នាក់បរិញ្ញាបត្រជាន់ខ្ពស់ផ្នែកព្យាបាល និងប្រឹក្សាផ្លូវចិត្តពីសាកលវិទ្យាល័យភូមិន្ទភ្នំពេញនៅឆ្នាំ២០១៦។ លើសពីទៀតនេះ លោក លឹមហួរ បានទទួលវិញ្ញាបនបត្រវិជ្ជាជីវៈផ្នែកបណ្តុះបណ្តាលគ្រូបង្គោល ដោយផ្តោតលើគោលការណ៍ «កុំបង្កគ្រោះថ្នាក់»៕ 

លោក ស៊ីយ៉ុន សុធារិទ្ធ មានបទពិសោធន៍វិជ្ជាជីវៈការងារជាង១៨ ឆ្នាំ ជាមួយអង្គការមិនមែនរដ្ឋាភិបាល ជាតិ និងអន្តរជាតិជាច្រើន។ គាត់មានជំនាញជាច្រើនដែលបម្រើនៅក្នុងវិស័យដូចជា ធុរកិច្ច កសិកម្ម ការគ្រប់គ្រងធនធានធម្មជាតិ ដីធ្លី ការអប់រំ សិទ្ធិស្ត្រី និងយេនឌ័រ។ លោក សុធារិទ្ធ មានចំណេះដឹងយ៉ាងទូលំទូលាយលើផ្នែកការត្រួតពិនិត្យ ការវាយតម្លៃ និងការរៀនសូត្រ (MEL) ការគ្រប់គ្រងមូលនិធិ ការអភិវឌ្ឍភាពជាដៃគូ យុទ្ធនាការ ការតស៊ូមតិ ការរៀបចំគម្រោងស្នើសុំមូលនិធិ និងការកៀរគរថវិកា។ តាមរយៈការងាររបស់គាត់ លោក សុធារិទ្ធ បានកាន់តួនាទីផ្នែកបច្ចេកទេស ការគ្រប់គ្រង និងការដឹកនាំសំខាន់ៗ ជាពិសេស លោកបានចំណាយពេលជាងមួយទសវត្សរ៍នៅក្នុងអង្គការអាក់សិនអេដកម្ពុជា (ActionAid Cambodia)  អង្គការសង្គ្រោះកុមារអន្តរជាតិ (Save the Children International) និងអង្គការទស្សនៈពិភពលោក។ បច្ចុប្បន្ននេះ លោក សុធារិទ្ធ បានចាប់អារម្មណ៍ជាពិសេសចំពោះគុណតម្លៃ និងភាពជាអ្នកដឹកនាំរបស់អង្គការ Heifer International ជាកន្លែងដែលលោកចូលរួមចំណែកក្នុងបេសកកម្មរបស់ស្ថាប័ននេះ។ លោក សុធារិទ្ធ បានបញ្ចប់បរិញ្ញាបត្រផ្នែកគ្រប់គ្រងពាណិជ្ជកម្ម។ លោកក៏បញ្ចប់បរិញ្ញាបត្រជាន់ខ្ពស់ផ្នែកគ្រប់គ្រងពាណិជ្ជកម្ម ឆ្នាំ២០០៨ ពីសាកលវិទ្យាល័យបញ្ញាសាស្ត្រផងដែរ៕