គម្រោងធុរកិច្ចនិងសិទ្ធិមនុស្ស II
តើគម្រោងនេះជាអ្វី?
“ការពង្រឹងសមត្ថភាពដល់អង្គការសង្គមស៊ីវិលក្នុងការតស៊ូមតិដើម្បីបង្កើនឲ្យមានការគោរពសិទ្ធិមនុស្សពីសំណាក់ក្រុមហ៊ុនសាជីវកម្មក្នុងវិស័យដីធ្លី” គឺជាគម្រោងធុរកិច្ច និងសិទ្ធិមនុស្សដែលអនុវត្តរួមគ្នារវាងមជ្ឈមណ្ឌលសិទ្ធិមនុស្សកម្ពុជានិងអង្គការអាក់សិនអេតកម្ពុជា។ គម្រោងធុរកិច្ច និងសិទ្ធិមនុស្សមានគោលដៅជំរុញឲ្យមានការគោរពសិទ្ធិមនុស្សក្នុងចំណោមក្រុមហ៊ុនសាជីវកម្មទាំងឡាយដែលវិនិយោគក្នុងវិស័យដីធ្លីនៅកម្ពុជា ជាពិសេសផ្តោតការយកចិត្តទុកដាក់ទៅលើសកម្មភាពជំនួញលើវិស័យកសិ-ធុរកិច្ចរបស់ក្រុមហ៊ុនមកពីសហគមន៍អឺរ៉ុប។ ម្យ៉ាងទៀតគម្រោងនេះនឹងជំរុញឱ្យមានការទទួលយកនូវគំនិតដែលក្រុមហ៊ុនសាជីវកម្មមានកាតព្វកិច្ចតាក់តែងនិងអនុវត្តគោលនយោបាយស្តីពីទំនួលខុសត្រូវសង្គមរបស់សាជីវកម្មអនុលោមទៅតាមបទដ្ឋានសិទ្ធិមនុស្សអន្តរជាតិ។
ហេតុអ្វីចាំបាច់មានគម្រោងនេះ?
ការបង្កើតឲ្យមានគម្រោងនេះពិតជាតម្រូវការចាំបាច់ណាស់នៅកម្ពុជាដែលនៅក្នុងប្រទេសនេះពុំទាន់មានប័ណ្ណកម្មសិទ្ធិផ្លូវការគ្រប់គ្រាន់ និងការអនុវត្តច្បាប់នៅមានលក្ខណៈទន់ខ្សោយ ហើយកាន់តែអាក្រក់ទៅទៀតនោះគឺមានអំពើរពុករលួយត្រាំត្រែង ដែលជាកត្ដាអំណោយផលដល់ក្រុមហ៊ុនសាជីវកម្មប្រព្រឹត្តនូវអំពើរំលោភបំពានសិទ្ធិមនុស្សក្នុងវិស័យដីធ្លីដោយរួចផុតពីទោសទណ្ឌ។ មានការប៉ាន់ប្រមាណថាគ្រួសារពលរដ្ឋកម្ពុជាចំនួនរហូតដល់មួយភាគបួន មានជាប់ពាក់ព័ន្ធក្នុងជម្លោះដីធី្ល[1] ដែលជាញឹកញាប់ពាក់ព័ន្ធនឹងការរំលោភបំពានដីធ្លីពីសំណាក់ក្រុមហ៊ុនសាជីវកម្មដែលទទួលបានសិទ្ធិវិនិយោគតាមរយៈដីសម្បទានសេដ្ឋកិច្ចពីរាជរដ្ឋាភិបាលកម្ពុជា។
តើគម្រោងនេះអនុវត្តយ៉ាងដូចម្តេច?
គម្រោងនេះនឹងខិតខំដើម្បីសម្រេចទិសដៅរបស់ខ្លួនតាមរយៈសកម្មភាពដូចខាងក្រោម ៖
- សម្របសម្រួលឲ្យមានកិច្ចពិភាក្សារវាងរដ្ឋាភិបាល ក្រុមហ៊ុនសាជីវកម្ម និងសហគមន៍រងផលប៉ះពាល់
- ពង្រឹងអំណាចដល់សហគមន៍មូលដ្ឋាន និងអង្គការសង្គមស៊ីវិលក្នុងការតស៊ូមតិដើម្បីសិទ្ធិរបស់ពួកគេនិង
- ធ្វើយុទ្ធនាការតាមប្រព័ន្ធផ្សព្វផ្សាយដើម្បីបង្កើនឲ្យមានការទាមទារពីសាធារណជនចំពោះទំនួលខុសត្រូវសង្គមរបស់សាជីវកម្ម និងការគោរពសិទ្ធិមនុស្សអោយកាន់តែប្រសើរឡើង
គម្រោងនេះនឹងត្រូវអនុវត្តក្នុងរយៈពេល ៥ ឆ្នាំចាប់ពីឆ្នាំ២០១៦ រហូតដល់ឆ្នាំ២០២០ ហើយទទួលបានការឧបត្ថម្ភមូលនិធិពីសំណាក់កម្មវិធីពិព័រណ៍ពាណិជ្ជកម្មបៃតងសកលដែលជាសម្ព័នអង្គការសង្គមស៊ីវិលនៃប្រទេសហូឡង់ ធ្វើការផ្ដោតសំខាន់ទៅលើប្រតិបត្ដិការរបស់ក្រុមហ៊ុនសាជីវកម្ម ពាណិជ្ជកម្មនិងការវិនិយោគ និងប្រព័ន្ធហិរញ្ញវត្ថុ និងពន្ធដា។
តើនរណាជាក្រុមគោលដៅ
ក្រុមគោលដៅនៃគម្រោងធុរកិច្ច និងសិទ្ធិមនុស្សគឺសំដៅទៅលើភាគីពាក់ព័ន្ធទាំងអស់ក្នុងទំនាស់ដីធ្លីដែលជាប់ពាក់ព័ន្ធនឹងក្រុមហ៊ុនសាជីវកម្ម រួមមាន សហគមន៍ដែលរងការប៉ះពាល់នានា រដ្ឋាភិបាល អង្គការសង្គមស៊ីវិល និងក្រុមហ៊ុនសាជីវកម្មខ្លួនឯងផ្ទាល់។ បនែ្ថមលើនេះ គម្រោងនឹងផ្តោតគោលដៅទៅលើសាធារណៈជនដើម្បីបង្កើនការទាមទារឱ្យមានទំនួលខុសត្រូវរបស់សង្គមសាជីវកម្ម និងការគោរពសិទ្ធិមនុស្សឲ្យកាន់តែប្រសើរឡើង។
-------------------------------------------------[1] ម.ស.ម.ក របាយការណ៍ “ទំនាស់ដីធ្លី ៖ ទិដ្ឋភាពទូទៅអំពីស្ថានភាពដីធ្លី“ ធ្នូ២០១៣ http://bit.ly/1KtPNVy
