គម្រោងលើកស្ទួយសមាសភាពស្រ្តីនៅក្នុងវិស័យនយោបាយនៅកម្ពុជា
តើអ្វីជាគម្រោងលើកស្ទួយសមាសភាពស្រ្តីនៅក្នុងវិស័យនយោបាយនៅកម្ពុជា?
គម្រោងនេះមានបំណងលើកស្ទួយសមាសភាពស្រ្តីនៅក្នុងវិស័យនយោបាយនៅកម្ពុជា ជាពិសេសតាមរយៈការតស៊ូមតិដើម្បី ឲ្យមានអ្នកតំណាងជាស្រ្តីយ៉ាងតិច៣០ភាគរយក្នុងគ្រប់លំដាប់រដ្ឋាភិបាល។ គម្រោងនេះជាផ្នែកមួយនៃកម្មវិធីថ្នាក់តំបន់មានគោលបំណង “កសាងដៃគូប្រកបដោយស្ថិរភាពក្នុងការលើកស្ទួយអ្នកតំណាងស្រ្តីក្នុងវិស័យនយោបាយនៅតំបន់អាស៊ីអាគ្នេយ៍” ។ កម្មវិធីនេះគ្រប់គ្រងដោយអង្គការដៃគូរដើម្បីកំណែទម្រង់អភិបាលកិច្ច(Kemitraan) ដែលជាអង្គការមិនមែនរដ្ឋាភិបាលនៅប្រទេសឥណ្ឌូនេស៊ី សហការជាមួយនឹងវិទ្យាស្ថានជាតិប្រជាធិបតេយ្យប្រចាំនៅឥណ្ឌូនេស៊ី ក្រោមកិច្ចឧបត្ថម្ភពីទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្តរជាតិ(USAID)។ កម្មវិធីនេះនឹងផ្តោតទៅលើការពង្រឹងប្រជាធិបតេយ្យនិងសិទ្ធិនយោបាយរបស់ស្រ្តីនៅក្នុងប្រទេស៥នៅតំបន់អាស៊ីអាគ្នេយ៍តាមរយៈការលើកស្ទួយកំណើនអ្នកតំណាងជាស្ត្រីក្នុងនយោបាយតាមរយៈគំនិតផ្តួចផ្តើមរបស់ដៃគូនៅថ្នាក់តំបន់។ ម.ស.ម.ក. នឹងជាដៃគូប្រចាំប្រទេសកម្ពុជា រួមជាមួយនឹង អង្គការសម្ព័នស្រ្តីឥណ្ឌូនេស៊ី (KPI) នៅប្រទេសឥណ្ឌូនេស៊ី អង្គការអឹមផោវើ (Persatuan Kesedaran Komuniti Selangor) នៅប្រទេសមាឡេស៊ី អង្គការក្រុមចលនាស្រ្តីនៅប្រទេសទីម័រលេស្ទ និង មជ្ឈមណ្ឌលពង្រឹងអំណាចប្រជាជន (CEP) នៅប្រទេសហ្វីលីពិន។ សកម្មភាពគម្រោងនេះនឹងអនុវត្តរយៈពេលពីរឆ្នាំ ដោយផ្តោតលើអ្នកតំណាងជាស្រ្តីនៅក្នុងវិស័យនយោបាយ ជាពិសេសនៅក្នុងបរិបទការបោះឆ្នោតឃុំសង្កាត់ខែមិថុនា២០១២ និង ការបោះឆ្នោតថ្នាក់ជាតិឆ្នាំ ២០១៣។
តើហេតុអ្វីជាមានគម្រោងនេះឡើង?
ដោយហេតុផលមួយចំនួនទាំង វប្បធម៌ នយោបាយ សេដ្ឋកិច្ចនិងសង្គម និងប្រវត្តិសាស្រ្ត អត្រាចូលរួមរបស់ស្រ្តីនៅក្នុងវិស័យនយោបាយកម្ពុជាមានកំរិតទៀបនៅឡើយ។ ដូចនេះហើយអ្នកតំណាងជាស្រ្តីនៅតែមានកំរិតទៀបណាស់នៅក្នុងគ្រប់លំដាប់អភិបាលកិច្ច។ នៅពេលបោះឆ្នោតឃុំសង្កាត់ឆ្នាំ ២០១២ និងការបោះឆ្នោតឆ្នាំ២០១៣ នាពេលខាងមុខនេះ ពិតជាសំខាន់ណាស់ដែលផ្តោតទៅលើកំណើនសមាសភាពស្រ្តីនៅក្នុងវិស័យនយោបាយ។ ស្រ្តីអាចជាតំណាងនៅក្នុងវិស័យនយោបាយពីលំដាប់ថ្នាក់រដ្ឋាភិបាលជាតិរហូតដល់ថ្នាក់ឃុំសង្កាត់។ ការបោះឆ្នោតនេះគឺជាឱកាសដ៏ពិសេសសម្រាប់គោលនយោបាយបញ្ច្រាបយេនឌ័រ។
តើគម្រោងនេះត្រូវអនុវត្តដោយរបៀបណា?
ដើម្បីឲ្យការតស៊ូមតិបង្កើនសមាសភាពស្រ្តីនៅក្នុងវិស័យនយោបាយ ម.ស.ម.ក នឹងប្រើយុទ្ធសាស្រ្តចម្រុះ រួមមាន (១)ការឃ្លាំមើលនិងការរៀបចំផែនទីនៃបេក្ខភាពស្រ្តីក្នុងការបោះឆ្នោតឃុំសង្កាត់ឆ្នាំ២០១២ និង ការបោះឆ្នោតជាតិឆ្នាំ២០១៣ (២)រៀបចំសិក្ខាសាលា/កិច្ចប្រជុំពហុគណបក្សដល់បេក្ខភាពស្រ្តីសម្រាប់ការបោះឆ្នោតទាំងពីរ (៣)រៀបចំកិច្ចពិភាក្សាតុមូលដោយផ្តោតលើបញ្ហាស្រ្តីនៅក្នុងនយោបាយ និង (៤)ការតស៊ូមតិថ្នាក់ជាតិនិងអន្តរជាតិ។ ម.ស.ម.កនឹងតស៊ូមតិនូវលទ្ធផលទាំងនេះដោយការផ្សព្វផ្សាយតាមវិទ្យុ ការផ្សព្វផ្សាយតាមអ៊ិនធើណែត របាយការណ៍ អត្ថបទស្រាវជ្រាវសង្ខេប សលាកបត្រព័ត៌មាន ជាពិសេសកិច្ចប្រជុំជាមួយអ្នកពាក់ព័ន្ធ និង កិច្ចពិភាក្សាតុមូលជាមួយនឹងសមាជិកគោលរបស់សង្គមស៊ីវិលនិងអ្នកតំណាងរបស់គណៈបក្សនយោបាយ។ ម.ស.ម.កនឹងជួបជាមួយនឹងសមាជិករបស់ចលនាស្រ្តីនៅកម្ពុជា ដើម្បីលើកពីចំណេះដឹងទាក់ទងនឹងកូតាដែលជាមធ្យោបាយមួយក្នុងការធានា ឲ្យមានតុល្យភាពយេនឌ័រក្នុងនយោបាយ។
តើអ្នកណាជាគោលដៅរបស់គម្រោង
គោលដៅរបស់គម្រោងរួមមាន អ្នកតំណាងរបស់គណៈបក្សនយោបាយ អ្នកតាក់តែងច្បាប់ បេក្ខភាពស្រ្តីក្នុងការបោះឆ្នោត និង សមាជិករបស់ចលនាស្រ្តី ព្រមទាំងស្រ្តីនិងប្រជាពលរដ្ឋទាំងអស់ដែលត្រូវបានថ្លែងការគាំទ្របោះឆ្នោតឲ្យបេក្ខភាពជាស្រ្តី។
