បុគ្គលិកអង្គការសង្គមស៊ីវិល និងសកម្មជនត្រូវបានចាប់ខ្លួនពេលធ្វើដំណើរទៅចូលរួមយុទ្ធនាការ “ថ្ងៃច័ន្ទពណ៌ខ្មៅ” ដើម្បីគាំទ្រសកម្មជនសិទ្ធិមនុស្សដែលជាប់ឃុំ

កាលបរិច្ឆេទបង្កើត	: 10 / May / 2016
លក្ខណៈនៃការគំរាម	:
សិទ្ធិដែលពាក់ព័ន្ធ	: សេរីភាពខាងការបញ្ចេញមតិ សេរីភាពខាងបង្កើតសមាគម

ការពិពណ៌នាលម្អិត

បុគ្គលិកអង្គការមិនមែនរដ្ឋាភិបាលចំនួនបួននាក់ ដែលមានពីរនាក់ជាទីប្រឹក្សាជនជាតិបរទេស ព្រមទាំងសកម្មជនដីធ្លីចំនួនបួននាក់ផ្សេងទៀតត្រូវបានចាប់ខ្លួនកាលពីព្រឹកម្សិលមិញ គឺថ្ងៃទី៩ ខែឧសភា ឆ្នាំ២០១៦ ខណៈដែលពួកគេធ្វើដំណើរទៅចូលរួមយុទ្ធនាការដែលគេដាក់ឈ្មោះថា “ថ្ងៃច័ន្ទពណ៌ខ្មៅ” ដើម្បីគាំទ្រសកម្មជនសិទ្ធិមនុស្សដែលជាប់ឃុំ។ អ្នកទាំងនោះត្រូវបានឃាត់ខ្លួន និងសាកសួរជាច្រើនម៉ោង មុនពេលធ្វើការដោះលែងនៅម៉ោងប្រមាណជា ៧ យប់។ លោក អ៊ី សារុំ នាយកប្រតិបត្តិសមាគមធាងត្នោត លោក ថាវ គឹមសាន្ត នាយករងប្រតិបត្តិអង្គការធ្វើការតស៊ូមតិដើម្បីសិទ្ធិមនុស្ស លីកាដូ និងអ្នកស្រី ស ស៊ន សកម្មជនដីធ្លីសហគមន៍បុរីកីឡា ត្រូវបានចាប់ខ្លួននៅក្នុងខណ្ឌដង្កោ ក្បែរពន្ធនាគារព្រៃស ជាកន្លែងដែលបុគ្គលិករបស់សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (“សមាគមអាដហុក”) ត្រូវឃុំខ្លួនពីបទ សូកប៉ាន់ នារីដែលត្រូវគេអះអាងថាជាស្រីកំណាន់ថ្នាក់ដឹកនាំគណបក្សជំទាស់ លោក កឹម សុខា ឱ្យបដិសេធពីទាំនាក់ទំនងរបស់ពួកគេ។ នៅខណៈពេលជាមួយគ្នា សកម្មជនបឹងកក់ចំនួនបីនាក់ក៏ត្រូវបានចាប់ខ្លួនផងដែរនៅពេលពួកគេចាកចេញពីតំបន់បឹងកក់ ហើយត្រូវបានឃុំខ្លួននៅសាលាខណ្ឌដូនពេញ។ ទីប្រឹក្សាជនជាតិបរទេសទាំងពីរនាក់ដែលធ្វើការឱ្យអង្គការលីកាដូ គឺលោក ម៉ាធីយ៉ាស ហ្វៃហ្វឺ (Mathias Pfeifer) និងកញ្ញា អាណា ភីធឺសុន (Anna Pettersson) ត្រូវបាននាំខ្លួនទៅឃុំឃាំងនៅខាងក្រៅទីស្នាក់ការនគរបាលខណ្ឌដង្កោបន្ទាប់ពីមានការប្រកែកជាមួយនគរបាល ហើយត្រូវបានបញ្ជូនទៅកាន់ការិយាល័យនគរបាលន្តោសប្រវេសន៍នៅក្បែរប្រលានយន្តហោះអន្តរជាតិភ្នំពេញ។ ការចាប់ខ្លួនទាំងនេះជាចលនាទប់ស្កាត់ទុកមុនដោយកងកម្លាំងសន្តិសុខដែលធ្វើឡើងនៅកន្លែងបិទផ្លូវនានាដែលអាជ្ញាធររារាំងបុគ្គលិកអង្គការមិនមែនរដ្ឋាភិបាល និងសកម្មជន។ ពួកគេធ្វើតាមសេចក្តីប្រកាសព័ត៌មានរបស់ក្រសួងមហាផ្ទៃកាលពីថ្ងៃអាទិត្យដោយចោទអ្នកតវ៉ាថាញុះញង់ ហើយព្រមានថា អាជ្ញាមានសមត្ថកិច្ចគ្រប់លំដាប់ថ្នាក់នឹងអនុវត្តតួនាទី ភារកិច្ចរបស់ខ្លួន ដើម្បីអនុវត្តច្បាប់ដោយម៉ឺងម៉ាត់ ក្នុងគោលដៅថែរក្សា”សន្តិភាព ស្ថិរភាពនយោបាយ និងសណ្ដាប់ធ្នាប់សង្គម” ។ រាជរដ្ឋាភិបាលកម្ពុជា (“រដ្ឋាភិបាល”) បានប្រដូចការតវ៉ានេះថាជាសកម្មភាពញុះញង់ និងបំបះបំបោរ ហើយចោទអ្នករៀបចំយុទ្ធនាការនេះថាព្យាយាមញុះញង់ឱ្យមាន បដិរដ្ដន៍ពណ៌នេះ ដែលទង្វើនេះបង្ហាញពីឥរិយាបថទៅលើក្រុមអ្នករិះគន់មកលើខ្លួននៅក្នុងដំណើរខិតជិតមកដល់នៃការបោះឆ្នោតឃុំសង្កាត់ឆ្នាំ២០១៧ និងការបោះឆ្នោតជាតិនៅឆ្នាំ២០១៨។ក្នុងចំណោមអ្នកត្រូវឃុំខ្លួនទាំងអស់ លើកលែងតែជនជាតិបរទេសពីរនាក់ប៉ុណ្ណោះ សុទ្ធតែត្រូវដោះលែងបន្ទាប់ពីចុះហត្ថលេខាព្រមព្រៀងថាមិនចូលរួមសកម្មភាពខុសច្បាប់ទាំងឡាយនាពេលអនាគត ហើយវាជាការអនុវត្តមួយដែលមជ្ឈមណ្ឌលសិទ្ធិមនុស្សកម្ពុជា (“ម.ស.ម.ក”) បានកត់សម្គាល់ឃើញថាជាយុទ្ធសាស្ត្រដែលរដ្ឋាភិបាលបានប្រើជាយូរមកហើយដើម្បីរឹតត្បិតទៅលើសិទ្ធិសេរីភាពខាងបញ្ចេញមតិនិងជួបប្រជុំ របស់អ្នកការពារសិទ្ធិមនុស្ស។ ការចាប់ខ្លួននេះជាឧទាហរណ៍មួយទៀតបង្ហាញពីការកើនឡើងនៃការបង្ក្រាបដោយរដ្ឋាភិបាលលើអ្នកតវ៉ាដោយសន្តិវិធីនិងបុគ្គលិកអង្គការសង្គមស៊ីវិលក្នុងឆ្នាំកន្លងទៅ ហើយកំពុងព្រមានដោយផ្ទាល់ទៅកាន់អ្នកដែលមានបំណងចូលរួមនៅក្នុងការតវ៉ានាពេលអនាគតដែលជាផ្នែកមួយនៃយុទ្ធនាការ។ បច្ចុប្បន្ននេះ មានសមាជិកគណបក្សប្រឆាំងចំនួន ១៨ នាក់ត្រូវបានជាប់ឃុំ ខណៈពេលដែលមេដឹកនាំគណបក្សប្រឆាំងលោក សម រង្ស៊ី កំពុងនិរទេសខ្លួនដោយសារតែការចេញដីកាចាប់ខ្លួនប្រឆាំងនឹងរូបលោកនៅក្នុងខែវិច្ឆិកា ឆ្នាំ២០១៥។ ក្រៅពីនេះ សកម្មជនអង្គការមាតាធម្មជាតិបីរូបត្រូវបានឃុំខ្លួនបណ្ដោះអាសន្នតាំងពីខែសីហា ឆ្នាំ២០១៥ ជាប់ពាក់ព័ន្ធទៅនឹងការតវ៉ារបស់ពួកគេប្រឆាំងនឹងការបូមខ្សាច់នៅក្នុងខេត្តកោះកុង។

ព័ត៌មានទំនាក់ទំនង

សម្រាប់ព័ត៌មានបន្ថែម សូមទាក់ទាក់អ្នកស្រី ឆាយ ឈុនលី ប្រធានគម្រោងការពារសេរីភាពមូលដ្ឋាន របស់ ម.ស.ម.ក តាមរយៈទូរស័ទ្ធលេខ ៖ +៨៥៥ (០) ១៧ ៥២៨ ០២១ ឬអ៊ីម៉ែល [email protected] ឬទីប្រឹក្សាច្បាប់ លោក ផាត ដឺប្រ៊ូន ទូរស័ទ្ធលេខ +៨៥៥ (០) ៨៩ ៥៣៦ ២១៥ ឬអ៊ីម៉ែល [email protected]_________________________[1] ម.ស.ម.ក, “ការដោះលែងដោយមានលក្ខខណ្ឌលើអ្នកការពារសិទ្ធិមនុស្សរំលោភលើសិទ្ធិជាមូលដ្ឋាននៃសេរីភាពខាងការបញ្ចេញមតិ និងជួបប្រជុំ” (កំណត់ត្រាសង្ខេប) (ថ្ងៃទី៥ ខែកុម្ភៈ ឆ្នាំ២០១៤) http://bit.ly/1N6PhZj[2] តាំង វីដា, “គម្រោងតវ៉ា ថ្ងៃច័ន្ទព័ណ៌ខ្មៅត្រូវបានគ្រោងឡើង”,ខ្មែរថាម, (ថ្ងៃទី៨ ខែឧសភា ឆ្នាំ២០១៦) http://bit.ly/1VQ6lwG[3] ឡាយ សាមាន, មាស សុខជា, រដ្ឋាភិបាលដោះលែងក្រុមស្លៀកខ្មៅ ដែលគេចោទថាក្រុមធ្វើបដិវត្តន៍ពណ៌, ភ្នំពេញប៉ុស្តិ៍ (ថ្ងៃទី១០ ខែឧសភា ឆ្នាំ២០១៦) http://bit.ly/1XiAWmc [4] ម.ស.ម.ក, សកម្មជនអង្គការមាតាធម្មជាតិត្រូវបានកំណត់មុខសញ្ញាជាថ្មី (សលាកប័ត្រព័ត៌មាន) (ខែមករា ឆ្នាំ២០១៦) http://bit.ly/1qaF4Y0

ការពិពណ៌នាលម្អិត

ព័ត៌មានទំនាក់ទំនង

តំណភ្ជាប់

ទំនាក់ទំនង