បុគ្គលិក​អង្គការ​មិនមែន​រដ្ឋាភិបាល និង​តំណាង​សហគមន៍​បានទទួល​ដីកា​បង្គាប់​ឱ្យចូល​ខ្លួន​នៅ​តុលាការ​ខេត្តព្រះវិហារ

កាលបរិច្ឆេទបង្កើត : 10 / Nov / 2018
លក្ខណៈនៃការគំរាម : ការបំភិតបំភ័យនិងយាយីតាមរយៈការប្រើប្រាស់បទចោទព្រហ្មទណ្ឌ
សិទ្ធិដែលពាក់ព័ន្ធ : សិទ្ធិមនុស្ស

ការពិពណ៌នាលម្អិត


នៅ​ថ្ងៃទី​៥ ខែវិច្ឆិកា ឆ្នាំ​២០១៨ នគរបាល​បាន​នាំយក​ដីកា​បង្គាប់​ឱ្យចូល​ខ្លួន មកឱ្យ​លោក ប៉ឹ​ក សោភ័ណ បុគ្គលិក​អង្គការ​ពន្លក​ខ្មែរ ដើម្បីឱ្យ​លោក​ចូលខ្លួន​មក​សាកសួរ​នៅ​សាលាដំបូង​ខេត្តព្រះវិហារ​នៅ​ថ្ងៃទី​១៤ ខែវិច្ឆិកា ឆ្នាំ​២០១៨ ពីបទ​សមគំនិត​ក្នុង​អំពើ​ចាប់​ឃុំឃាំង និង​ការ​បង្ខាំង​ដោយ​ខុសច្បាប់ (​មាត្រា​២៩ និង​មាត្រា​២៥៣ នៃ​ក្រមព្រហ្មទណ្ឌ​នៃ​ព្រះរាជាណាចក្រ​កម្ពុជា​)​។ យោងតាម​ព័ត៌មាន​នៅក្នុង​ដីកា​បង្គាប់​ឱ្យចូល​ខ្លួន បទ​ចោទ​នេះ​ពាក់ព័ន្ធ​ទៅនឹង​ហេតុការណ៍​ដែល​បាន​កើតឡើង​កាលពី​ថ្ងៃទី​២៩ ខែធ្នូ ឆ្នាំ​២០១៤ នៅក្នុង​ឃុំ​ប្រមេរ ស្រុក​ត្បែងមានជ័យ ខេត្តព្រះវិហារ​។ មិនមាន​ព័ត៌មាន​លម្អិត​បន្ថែមទៀត នៅក្នុង​ដីកា​បង្គាប់​ឱ្យចូល​ខ្លួន​នោះទេ ដែល​ផ្ទុយ​ពី​សិទ្ធិ​ដើម្បីឱ្យ​លោក​សោភ័ណ​បានដឹង​ពីបទ​ចោទប្រកាន់​ប្រឆាំង​រូបគាត់​។ នាមត្រកូល និង​ព័ត៌មាន​ផ្ទាល់ខ្លួន​របស់លោក សោភ័ណ ដែលមាន​នៅក្នុង​ដីកា​បង្គាប់​ឱ្យចូល​ខ្លួន​មិន​ត្រឹមត្រូវ ជាហេតុ​នាំឱ្យ​លោក​បដិសេធ​ទទួល​ដីកា​នោះ ហើយ​ស្នើឱ្យ​នគរបាល​បញ្ជូន​ត្រឡប់​ទៅ​តុលាការ​វិញ​ដើម្បី​កែតម្រូវ​។ នៅ​ថ្ងៃ​ជាមួយគ្នា​នោះ លោក​លូត សាំង ដែលជា​បុគ្គលិក​អង្គការ​ពន្លក​ខ្មែរ​ដូចគ្នា​ក៏បាន​ទទួល​ព័ត៌មាន​ថា​នគរបាល​មូលដ្ឋាន​បាន​នាំយក​ដីកាកោះ​ទៅឱ្យ​រូបលោក​ផងដែរ​។ នៅពេលនោះ​លោក​ជាប់​បំពេញបេសកកម្ម​នៅតាម​មូលដ្ឋាន ដូច្នេះ​លោក​មិនបាន​ទទួល​ដីកា​នោះទេ​។ លោក​មិន​បានដឹង​ពីបទ​ចោទ​ដែលមាន​នៅក្នុង​ដីកា​នោះទេ​។​​ពន្លក​ខ្មែរ គឺជា​អង្គការ​មិនមែន​រដ្ឋាភិបាល​តូច​មួយ​ដែលមាន​មូលដ្ឋាន​នៅ​ខេត្តព្រះវិហារ​ធ្វើការ​ដើម្បី​លើកកម្ពស់​ការអភិវឌ្ឍ​ប្រកបដោយ​និរន្តរភាព និង​ការពារ​ធនធានធម្មជាតិ​កម្ពុជា តាមរយៈ​ការពង្រឹង​អំណាច​ដល់​ជន​ងាយ​រងគ្រោះ​និង​ជនជាតិដើម​ភាគតិច​ដើម្បី​ធានាបាន​នូវ​ការការពារ​សិទ្ធិ​របស់​ពួកគេ​។ ​ក្រៅពីនេះ យ៉ាងហោចណាស់​សមាជិក​សហគមន៍​បួនរូប​ក្នុង​ក្រុម​ជនជាតិដើម​គួ​យ​នៅក្នុង​ឃុំ​ប្រមេរ​បានទទួល​ដីកា​នៅ​ថ្ងៃទី​០៥ ខែវិច្ឆិកា ឆ្នាំ​២០១៨ បង្គាប់​ឱ្យចូល​ខ្លួន​នៅ​តុលាការ​ខេត្តព្រះវិហារ​នៅ​ថ្ងៃ​ដូចគ្នា​ជាមួយ​លោក សោភ័ណ​ផងដែរ​។ ពួកគេ​ត្រូវបាន​បង្គាប់​ឱ្យចូល​ខ្លួន​ក្រោម​បទ​ចោទ​ចាប់​ឃុំឃាំង និង​ការ​បង្ខាំង​ដោយ​ខុសច្បាប់ (​មាត្រា​២៥៣ នៃ​ក្រមព្រហ្មទណ្ឌ​) ពាក់ព័ន្ធ​នឹង​អង្គហេតុ​ដែល​បាន​ប្រព្រឹត្ត​នៅ​ថ្ងៃទី​២៩ ខែធ្នូ ឆ្នាំ​២០១៤ នៅក្នុង​ឃុំ​ប្រមេ​។ មាន​ព័ត៌មាន​ថា​សមាជិក​សហគមន៍​ចំនួន​ដប់​នាក់​បានទទួល​ដីកា​ដូចគ្នានេះ ប៉ុន្តែ ម​.​ស​.​ម​.​ក បានឃើញ​ដីកា​តែ​បួន​ប៉ុណ្ណោះ​។ ​ចាប់តាំងពី​ឆ្នាំ​២០១២ មក ឃុំ​ប្រមេរ​បានក្លាយ​ជាទី​តាំង​នៃ​ជម្លោះដីធ្លី​ពាក់ព័ន្ធ​នឹង​សហគមន៍​មូលដ្ឋាន​ជនជាតិដើម​គួ​យ និង​ក្រុមហ៊ុន​ពីរ​គឺ​ក្រុមហ៊ុន​ឡាន​ហ្វេ​ង និង​ក្រុមហ៊ុន​រួយ​ហ្វេ​ង​ដែល​ទទួលបាន​ដី​សម្បទាន​សេដ្ឋកិច្ច​ពីរ​ផ្សេងគ្នា​នៅ​ឆ្នាំ​២០១១ ក្នុង​គោលបំណង​ដាំ​ដើម​កៅស៊ូ អាកាស្យា និង​អំពៅ ដែលមាន​ទីតាំងនៅ​លើទឹក​ដី​ដូនតា​របស់​សហគមន៍​ជនជាតិដើម​គួ​យ​។ នៅ​ថ្ងៃទី​២៩ ខែធ្នូ ឆ្នាំ​២០១៤ គ្រឿងចក្រ​បានមក​ឈូសឆាយ​ដីស្រែ​របស់​អ្នកភូមិ​សម្រាប់​ដី​សម្បទាន​សេដ្ឋកិច្ច​។ អ្នកភូមិ​ដែល​រង់ចាំ​ឱ្យមាន​ការដោះស្រាយ​ជម្លោះដីធ្លី​បាន​បញ្ឈប់​គ្រឿងចក្រ ក្នុង​គោលបំណង​ឱ្យមាន​ការយកចិត្តទុកដាក់​ពី​អាជ្ញាធរ និង​ក្រុមហ៊ុន​ដើម្បី​បន្ត​ចរចា​ស្វែងរក​ដំណោះស្រាយ​ក្នុង​ជម្លោះដីធ្លី​។ ដោយ​មិន​មានការ​អើពើ​ណាមួយ នៅ​ថ្ងៃទី​៣០ ខែធ្នូ អ្នកភូមិ​បាន​បង្ខំ​ឱ្យ​តៃកុង​គ្រឿងចក្រ​បើក​គ្រឿងចក្រ​ទៅកាន់​ឃុំ​ប្រមេរ ដើម្បី​ទៅ​ជួបនឹង​អាជ្ញាធរ​។ តៃកុង​គ្រឿងចក្រ​ទាំងពីរ​រូបនោះ បាន​ចាក​ចេញទៅ​ជាមួយនឹង​អាជ្ញាធរ​នៅ​ថ្ងៃ​ដដែល​នោះ​។ ប៉ុន្តែ​ដោយ​គ្មាន​ដំណោះស្រាយ សមាជិក​សហគម​ន៍ប​ដិ​សេធ​ការនាំយក​គ្រឿងចក្រ​ទៅវិញ​។ គ្រឿងចក្រ​នេះ​ត្រូវបាន​រក្សាទុក​នៅ​សាលាឃុំ​រហូតដល់ ឆ្នាំ​២០១៧ ដែល​គ្រឿងចក្រ​ទាំងពីរ​នេះ​ត្រូវបាន​ដកហូត​ដោយ​អាជ្ញាធរ​ដើម្បី​ជា​ភស្តុតាង​ក្នុង​ការបន្ត​នីតិវិធី​បន្ថែមទៀត​។ ​លោក លូត សាំង និង​សមាជិក​សហគមន៍​មួយចំនួន​ធ្លាប់បាន​កោះហៅ​ដើម្បី​ឆ្លើយបំភ្លឺ​ពាក់ព័ន្ធ​នឹង​ហេតុការណ៍​ថ្ងៃទី​២៩ ខែធ្នូ ឆ្នាំ​២០១៤ កាលពី​ឆ្នាំ​២០១៥ ពាក់ព័ន្ធ​នឹង​បទ​ចាប់​ឃុំឃាំង និង​ការ​បង្ខាំង​ដោយ​ខុសច្បាប់​។ ដោយសារតែ​មិនមាន​ការវិវត្ត​ណាមួយ​កើតឡើង​តាំងពី​ពេល​នោះមក ពួកគេ​បាន​គិតថា​សំណុំ​រឿងនេះ​ត្រូវបាន​បិទ​ទៅហើយ​។

ព័ត៌មានទំនាក់ទំនង


សម្រាប់​ព័ត៌មាន​បន្ថែម សូម​ទាក់ទង​អ្នកសម្របសម្រួល​គម្រោង​ការពារ​សេរីភាព​មូលដ្ឋាន អ្នកស្រី សន រ៉ា​មណា តាមរយៈ ទូរស័ព្ទ​លេខ +៨៥៥ (០) ១៧ ៦៥៥ ៥៩១ ឬ​តាមរយៈ​អ៊ី​ម៉ែ​ល [email protected]